Стартапот за електрични возила „Никола“ и „Генерал моторс“ најавија стратешко партнерство со инвестиција на „Генерал моторс“ вредна две милијарди американски долари, за производство на теренски возила на водороден погон.
Акциите на двете компании на берзанските тргувања пораснаа значително, на „Никола“ пораснаа за 45 отсто, а на „Генерал моторс“ за 11 отсто.
Со оваа инвестиција, американскиот автомобилски гигант од Детроит добива 11 проценти од компанијата и едно место во бордот на директори на „Никола“. Компанијата од Аризона е стартап за електрични возила, конкурент на „Тесла“.
Стартапот за електрични возила „Никола“ ги дизајнира пикап теренците „Баџер“. Според договорот, сериското производство на овие возила треба да започне до крајот на 2022 година. Погонот на возилата со водород е целосно електричен. За разлика од патничките автомобили на „Тесла“, струјата за електромоторите не доаѓа од литиум-ионова батерија која треба регуларно да се полни од електромрежата, туку од водородни ќелии. Возилата со ваков погон имаат нула издувни гасови, трошат водород, а нуспроизвод е вода. Полнењето на ќелиите се врши на водородни станици кои на запад засега се многу ретки. Според договорот, „Никола“ е должна да ја користи технологијата и производството на водородни ќелии на „Генерал моторс“.
