Одборот на директори на „Тошиба“ го одобри планот за поделба на легендарниот јапонски конгломерат на три компании, како што соопшти денеска, по тензиите со акционерите и контроверзната понуда за преземање.
Соопштението ја потврдува веста од почетокот на неделата, која вели дека менаџментот е под притисок на акционерите да ја максимизира вредноста на компанијата со поделба на нејзините компании.
Предлогот има за цел да одвои две компании од другите операции на „Тошиба“, едната фокусирана на инфраструктурата, а другата на уредите. Овој потег се очекува да трае две години, со цел двете нови компании да излезат на берзата, соопшти „Тошиба“.
„Разделувањето овозможува посилен фокус на секоја од активностите и значително го олеснува пофлексибилното одлучување. На овој начин, двете компании ќе бидат многу подобро позиционирани да ги искористат предностите на нивните различни пазарни позиции, приоритети и двигатели на растот и да обезбедат одржлив профитабилен раст и зголемена вредност за акционерите“, се наведува во соопштението на компанијата.
Одлуката доаѓа по неколкумесечни превирања во компанијата, вклучително и смена на претседателот на одборот.
