Обединетите нации (ОН) процениле дека светското население ќе достигне 8 милијарди на 15 ноември и дека Индија следната година ќе ја замени Кина како најнаселена нација во светот, јавува Евроњуз.
Во извештајот објавен по повод Светскиот ден на населението, од ОН, исто така рекоа дека глобалниот раст на населението падна под 1% во 2020 година за прв пат од 1950 година.
Според најновите проекции на ОН, светската популација би можела да порасне на околу 8.5 милијарди во 2030 година. Тој број ќе скокне на 9.7 милијарди во 2050 година и со врв од околу 10.4 милијарди во текот на 2080-тите. На тоа ниво се предвидува да остане до 2100 година.
Во извештајот се вели дека повеќе од половина од проектираното зголемување на населението до 2050 година ќе биде концентрирано во само осум земји Конго, Египет, Етиопија, Индија, Нигерија, Пакистан, Филипини и Танзанија.
Извештајот „Перспективи за светската популација 2022“ покажува дека светската популација сега е 7.942 милијарди и предвидува дека во средината на ноември ќе достигне 8 милијарди.
