Кардиоваскуларните болести се причина за четири смртни случаи од 10 во Европа, што значи дека од тие болести секој ден на европскиот континент умираат 10.000 луѓе, а на годишно ниво умираат 4 милиони луѓе, извести денес Светската здравствена организација. СЗО им советува на Европејците помалку да консумираат сол.
Со имплементација на политика за намалувње на внесот на сол за 25% до 2030 година би можеле да се спасат околу 900.000 животи изгубени од кардиоваскуларни болести, вели Ханс Клуге, регионален директор на СЗО за Европа.
На Стариот континент една возрасна личност од три на возраст од 30 до 79 години пати од зголемен крвен притисок, кој често е последица од претерана консумација на сол.
Дури 51 од 53 европски земји дневно просечно консумираат количина на сол над највисоко препорачаното ниво на СЗО од 5 грама или една мала лажичка, главно поради консумација на преработена храна или претерано посегнување по грицки.
СЗО предупредува дека претераната консумација на сол го зголемува артерискиот притисок, кој е еден од главните виновници за развој на кардиоваскуларни болести, кои можат да предизвикаат срцев и мозочен удар.
Според статистичките податоци на СЗО, Европа има најголема преваленција на покачен крвен притисок во светот, додека мажите се дури два и пол пати поизложени на ризик од смрт од кардиоваскуларни болести.
Исто така, веројатноста да се умре од таквите болести млад, на возраст од 30 до 69 години, е пет пати поголема во источна Европа и во централна Азија отколку во западна Европа.
(Zimo)
(фото: Flickr)
