Голема црвена свиња опкружена со три човечки фигури – ова е сцена насликана пред повеќе од 51.000 години на ѕидот на една пештера во Индонезија, а тоа го прави најстарото уметничко дело во светот, објавија научниците.
Иако скромно изгледа, цртежот јасно раскажува приказна и ова е најстариот познат доказ за раскажување приказни, кој му претходи на пештерските слики на Ласко и Шове во Франција, вели археологот Адам Брум, еден од авторите на студијата објавена вчера во научното списание Nature.
Претходниот рекорд го држеше сцена од лов, идентификувана од истиот тим истражувачи во 2019 година во индонезиска пештера, чија старост тогаш се проценуваше на речиси 44.000 години.
Најновото откритие во блиската пештера Марос-Пангкеп на островот Сулавеси го означува првиот пат кога ја надминавме старосната граница од 50.000 години, вели коавторот на студијата, археологот Максим Оберт од Австралискиот универзитет Грифит.
„Фактот дека најраните претставници на нашиот вид можеле да раскажат таква софистицирана приказна преку уметност може да го смени нашето разбирање за когнитивната еволуција на хомо сапиенсот“, додава тој.
Истражувачите примениле нов метод кој користи ласери и софтвер за да генерира мапи на шеми на карпи за да одреди кога е нацртана сликата.
Тешко е да се разбере значењето на овие слики со црвена боја, но тие јасно го опишуваат дејството. Оберт претпоставува дека ова дело веројатно е создадено од првите групи луѓе кои ја преминале Југоисточна Азија пред да пристигнат во Австралија пред околу 65.000 години.
Првите слики направени од човечка рака се едноставни линии, откриени во Јужна Африка и датираат од пред 100.000 години.
(Beta)
(фото: Griffith University)
