Целта поставена на минатогодишната конференција за климата, а тоа е тројно зголемување на капацитетот за производство на електрична енергија од обновливи извори на енергија до 2030 година, е на дофат, истакна Меѓународната агенција за енергија (ИЕА) во извештајот објавен оваа недела.Според ИЕА, производствениот капацитет на зелена електрична енергија ќе се зголеми за 2,7 пати до 2030 година. Така, електричната енергија од обновливи извори ќе покрие речиси половина од потребите на светот, ги сумираше француската новинска агенција АФП наодите на ИЕА.
Климатските и енергетските политики на многу земји имаа значително влијание врз зголемувањето на капацитетот за производство на зелена енергија по конкурентни цени. Во оваа насока, со поголема побарувачка, се вклучија и приватни компании и домаќинства, а како резултат на тоа се зголеми производството на соларни панели и турбини на ветер, наведува ИЕА.
Според нив, движечка сила зад растот на обновливите извори на енергија е брзиот развој во Кина и проширувањето на фотоволтаиците. До 2030 година, 60 отсто од растот на обновливите извори на енергија се очекува да се случи во Кина, при што се очекува Индија да забележи најбрз раст во оваа област меѓу големите економии.
До 2030 година се очекува 80 отсто од капацитетот за производство на електрична енергија од обновливи извори на енергија да биде поврзан со фотоволтаични системи. Причина за тоа е изградбата на нови големи соларни централи и зголемувањето на бројот на соларни колектори на покривите на фирмите и домовите.
(Seebiz.eu)
Фото – Wikimedia Commons
