Магнетниот северен пол на Земјата го продолжува своето непредвидливо патување кон Русија, а најновиот модел обезбедува прецизни ажурирања на навигацијата до 2029 година. Светскиот магнетен модел 2025 (WMM2025), објавен на 17 декември, нуди ажурирани сознанија за променливите магнетни полиња на Земјата. Иако важи само до 2029 година, моделот го следи тековното патување на северниот магнетен пол кон Русија.
За разлика од фиксниот географски Северен пол, магнетниот север е диктиран од динамичкото движење на течните метали во надворешното јадро на Земјата. Овие стопени метали создаваат електрични струи кои го произведуваат магнетното поле на нашата планета. Следствено, магнетните полови се менуваат со текот на времето, барајќи чести ажурирања од американската Национална океанска и атмосферска администрација (NOAA) и Британскиот геолошки институт (BGS).
Тоа последно ажурирање го воведува гореспоменатиот светски магнетен модел со висока резолуција (WMMHR2025), кој ја подобрува просторната резолуција од 3.300 километри на приближно 300 километри на екваторот. Ова подобрување поддржува критични технологии како што се GPS и сателитска навигација, кои се многу зависни од точноста на позицијата на магнетното поле.
Од 1830-тите години магнетниот северен пол се преселил приближно 2.250 километри низ северната хемисфера. Помеѓу 1990 и 2005 година неговата стапка на движење се зголемила од помалку од 15 километри годишно на околу 50-60 километри годишно. Неодамна тоа темпо се намали на 35 километри годишно.
Д-р Вилијам Браун од BGS ја истакна важноста на споменатиот модел. WMM беше официјално објавен денеска, осигурувајќи дека корисниците ги имаат најсовремените информации за да продолжат со точната навигација во следните пет години, објасни тој.
„Сегашното однесување на магнетниот север е нешто што никогаш претходно не сме го забележале. Магнетниот север полека се движи низ Канада од 16 век, но во изминатите 20 години забрза кон Сибир, зголемувајќи ја брзината секоја година до пред околу пет години, кога наеднаш забави“, рече Браун.
Таквото забавување означува значителна промена во магнетното поле на Земјата, што ја нагласува потребата од споменатите ажурирања.
(IFLScience)
(фото: Wallpaper Flare)
