Социјалното претпријатие „Билкилајф“ спроведува серија обуки за едукација во областа на социјалното претприемништво за млади од 19 до 35 години. Обуките имаат за цел да ги запознаат младите со поимот социјално претприемништво, како да создаваат бизнис идеи, да направат бизнис план за нив. Тие учат за основи на социјалното претприемништво, како да се гради бизнис со позитивно влијание врз заедницата,примена на знаењето преку студија на случај со нашето социјално претпријатие.
Потоа, под менторство на искусните обучувачи, Бети Деловска и Верица Јорданова, стекнаа знаење за практичните аспекти на градење бренд со социјална мисија, користење на дигиталните алатки за промоција, како и развојот на еколошки и општествено одговорни бизнис модели. Учесниците имаа можност да работат на реални примери, анализираат успешни социјални претпријатија и добијат конкретни насоки за примена на иновативни маркетинг решенија.
„Младите претприемачи се двигатели на иднината, а нивната подготвеност да креираат бизниси со позитивно влијание врз заедницата е клучна за одржлив развој. Преку вакви обуки, сакаме да им овозможиме знаење и алатки за успех во оваа област“, изјави Марија Георгиевска, извршна директорка на „Билкилајф“.
инаку, во оваа група на учесници на обуките, се млади од целата држава и студенти од БАС-Бизнис Академијата Смилевски.
Развивањето на социјални бизниси од страна на млади претприемачи има многу придобивки. Со тоа се поттикнуваат социјални промени.Младите претприемачи може да донесат нови и иновативни решенија за проблеми во нивната заедница, што може да доведе до значајни позитивни промени.Тоа ќе придонесе кон создавање на работни места и економски раст.Социјалните стартапи не само што решаваат проблеми, туку и создаваат нови работни места. Младите претприемачи може да создадат економски можности во своите заедници, што помага во економскиот развој и намалување на невработеноста.Исто така, со градење култура за социјални бизниси се поддржува инклузивноста.Имено, социјалните бизниси често се насочени кон групи кои се маргинализирани. Затоа, кога младите во општеството се едуцирани за социјално претприемништво, како млади претприемачи можат да обезбедат можности за сите. Со градење на оваа култура, се зголемува и еколошката одговорност.Многу социјални стартапи се фокусирани на одржливи практики и еколошка одговорност. Младите претприемачи може да доведат до намалување на отпадот, заштита на ресурсите и промовирање на зелени технологии.Потоа, влијае на поттикнување на иновативноста и креативноста. Социјалното претприемништво бара креативни решенија и иновации. Младите претприемачи, со својот свеж поглед и желба за промени, можат да донесат нови идеи и концепти кои се различни од традиционалните пристапи.Исто така, со изградена култура за социјално претприемништво, се подобрува личниот развој и лидерство.Развивањето на социјални бизниси помага на младите претприемачи да развијат лидерски вештини, управувачки способности и способности за решавање на проблеми. Овие вештини можат да им помогнат во нивната професионална и лична кариера. Изградената култура за социјално претприемништво поттикнува партнерства и нови инвестиции.Имено,социјалните бизниси често привлекуваат инвеститори и партнери кои се заинтересирани за поддршка на иницијативи со позитивен социјален и еколошки импакт. Ова може да доведе до дополнителна финансиска поддршка и ресурси и да донесе поголем раст и развој, објаснуваат од Билкилајф.
Оваа едукативна иницијатива е дел од пошироките напори на Билкилајф за поддршка на младите иноватори и претприемачи, со цел создавање на економски одржливо, но и општествено корисно деловно окружување.
Обуките се дел од Проектот, „Едукација за млади социјални претприемачи – Иднина на одржливиот бизнис“, што го спроведува Билкилајф, кофинансиран од Министерството за економија и труд.
По завршување на обуките, ќе се организира натпревар за најдобра бизнис идеја со социјална мисија и најдобрите три, ќе бидат наградени.
