Шведската влада предложи полицијата да добие овластување да користи вештачка интелигенција за препознавање на лица во реално време во борбата против криминалот. Предложениот закон ќе и овозможи на полицијата да користи технологија за вештачка интелигенција за да лоцира или да идентификува луѓе во врска со сериозни кривични дела, како што се трговија со луѓе, киднапирање и убиства.
„За да се потисне криминалот на бандите и да се врати безбедноста во општеството, полицијата мора да има пристап до ефективни алатки“, рече министерот за правда. Гунар Стромер.
Владата соопшти дека новиот закон, кој допрва треба да биде ставен на гласање во парламентот и ќе стапи на сила на почетокот на 2026 година доколку биде усвоен, ќе биде во согласност со законите за личен интегритет и ќе се користи само за прашања од особено значење.
Шведска се мачи со насилство од бандите повеќе од една деценија и имаше убедливо највисока стапка на фатално вооружено насилство по жител во ЕУ во 2023 година, последната година за која се достапни споредливи статистички податоци.
Насилството ги засени сите други теми во шведската политика, поттикнувајќи го подемот на десничарската коалиција, која дојде на власт во 2022 година со поддршка на екстремната десница. Со формирањето на оваа коалиција заврши осумгодишното владеење на социјалдемократите, доминантна политичка сила во Шведска од 1930-тите години.
(N1)
(фото: Max Pixel)
