Австралискиот стартап Cortical Labs официјално го претстави првиот комерцијален компјутер кој ги интегрира човечките неврони со традиционалните компјутерски компоненти. Компјутерот наречен CL1 е опишан како „првиот биолошки компјутер во светот кој може да извршува код“, а според компанијата, оваа технологија би можела значително да го унапреди истражувањето на невролошките болести и развојот на нови лекови.
Системот CL1, споредлив по големина со кутија за чевли, содржи човечки неврони кои растат на силиконски чип, одржуван во раствор богат со хранливи материи. Оваа интеграција на биолошки и силиконски компоненти создава пресметковна архитектура која би можела да обезбеди нови сознанија за мозочните функции и болести. Уредот користи софистициран систем за одржување на виталноста на човечките неврони.
„Перфузионата компонента делува како систем за поддршка на животот на клетките – содржи филтрација за отпадни производи, контрола на температурата, мешање гас и пумпи кои ја одржуваат циркулацијата“, објасни за New Atlas, Брет Каган, главен научен директор на Cortical Labs.
Според спецификациите на компанијата, CL1 работи со минимална потрошувачка на енергија од само неколку вати и може да ги одржува нервните компоненти до шест месеци. Интерфејсот помеѓу биолошките и силиконските елементи овозможува испраќање електрични сигнали до и од невроните, овозможувајќи им да се обучуваат за специфични однесувања – способност што претходно беше покажана кога компанијата го научи својот систем DishBrain да ја игра видеоиграта Pong.
Истражувачите од Cortical Labs продолжуваат да работат на развојот на систем кој може прецизно да ги реплицира различните типови на клетки и функции на човечкиот мозок користејќи минимален број клетки. И покрај овие континуирани подобрувања, алатките како CL1 веќе покажуваат потенцијал за унапредување на третманот на невролошки состојби.
„Огромното мнозинство на лекови за невролошки и психијатриски болести кои влегуваат во клинички испитувања не успеваат, бидејќи има многу повеќе нијанси кога станува збор за мозокот – но тие нијанси можете да ги видите кога тестирате со овие алатки“, истакна Каган, истакнувајќи го потенцијалот за поефикасни процеси на развој на лекови.
Интеграцијата на човечките неврони во компјутерските системи предизвика дебати меѓу научниците за етичките импликации. Иако сегашните системи CL1 и DishBrain се значително помалку сложени од човечкиот мозок, некои истражувачи изразија загриженост за идниот развој на понапредна „синтетичка биолошка интелигенција“ и прашања поврзани со свеста и потенцијалното страдање.
CL1 е комерцијално достапен по цена од приближно 30.000 евра. Со оглед на тоа што системот бара соодветни лабораториски услови за правилно функционирање, Cortical Labs исто така планира да понуди опција за cloud computing за корисници кои немаат пристап до сопствениот уред, со што оваа иновативна технологија ќе биде достапна за поширок опсег на истражувачи и институции.
(Bug.hr)
(фото: Cortical Labs)
