Заборавете на панелите на покривите, Јапонија планира да собира сончева енергија директно од вселената и да ја испрати назад на Земјата. Станува збор за амбициозен проект наречен OHISAMA, именуван по јапонскиот збор за сонце, кој може да отвори сосема нова ера во производството на чиста енергија.
Иако сè уште нема да напојува цели градови, овој експеримент претставува значаен чекор кон користење на континуиран извор на енергија од орбитата – без оглед на временските услови и промената на денот и ноќта.
На Меѓународната конференција за вселенска енергија, одржана во Лондон во април 2024 година, Коичи Иџичи, советник на Japan Space Systems, презентираше детали за овој пионерски потфат.
Сателитот за тестирање тежи само 180 килограми, а опремен е со соларен панел нешто повеќе од два квадратни метри. Во орбитата ќе ја собира сончевата светлина, ќе ја складира во батерии, а потоа ќе ја зрачи енергијата назад кон Земјата во форма на микробранови.
Поради големата брзина на движење на сателитите во орбитата (околу 28.000 км/ч), приемните антени на Земјата мора да бидат распоредени во пречник од дури 40 километри и на растојание од околу 5 километри една од друга, за да може да се фати сигналот.
Во првата фаза од експериментот се очекува пренос на моќност од само 1 киловат, што е доволно да работи, да речеме, машина за миење садови во период од еден час. Иако изгледа скромно, овој тест е важен тест на технологијата што се развива во Јапонија повеќе од една деценија.
Јапонските истражувачи во 2015 година успешно пренесоа 1,8 киловати моќ безжично на растојание од 55 метри, додека подоцна ги проширија тестовите на 10 киловати на половина километар. Тие имаат за цел еден ден да лансираат огромни соларни електрани во геостационарна орбита, способни да произведат до еден гигават енергија – милион пати повеќе од сегашниот тест.
Таквото количество енергија може да снабдува стотици илјади домаќинства, особено во области погодени од катастрофи, оддалечени региони или места каде што пристапот до електричната мрежа е ограничен.
За разлика од соларните фарми на Земјата, кои зависат од сончевата светлина и временските услови, соларните панели во вселената можат да собираат енергија без прекин – 24 часа на ден, во текот на целата година.
Иако проектот сè уште е во раните фази и истражувачите се соочуваат со бројни технички и логистички предизвици – од безбедност до трошоци и меѓународни регулативи – OHISAMA го означува првиот конкретен чекор кон остварување на идејата за вселенски соларни фарми.
Јапонскиот тим останува оптимист. Доколку тестот биде успешен, следната генерација на сателити би можела да одигра клучна улога во глобалната енергетска транзиција и борбата против климатските промени.
(SCB)
(фото:Flickr )
