Дејан и Бобан Милосавлески се косопственици на „Вендор“, иновативен систем за креирање на е-продавници, кој на трговците им нуди брзо и едноставно, но и многу ефикасено средство на работа. „Вендор“ овозможува да започнат да продаваат онлајн без програмирање, да се поврзат со банка и други платежни методи со неколку клика, да менаџираат со своите залихи, производи и магацини.
Во интервју за Иновативност, Дејан и Бобан објаснуваат дека „Вендор“ функционира како all-in-one решение кое вклучува продавница, сервер, домен и техничко одржување, со една претплата и без дополнителни трошоци. Лансирањето веб-страница за е-трговија е за 75 отсто побрзо, а трошоците за развој и дизајн се намалени и за десетпати, со однапред изградените решенија.
Дејан и Бобан, кажете ни нешто повеќе за „Вендор“. Што всушност преку овој систем им нудите на клиентите?
„Вендор“ е систем за креирање на електронски продавници и поврзување со платежни методи, карго, ЕРП и други системи, наменет за компании кои оперираат во делот на B2B и B2C. Работиме со 150 компании од Македонија, Балканот, САД, Франција и други европски земји. Компанијата е основана во 2021 година, а на платформата работеа повеќе од 20 програмери од Македонија и Србија. Во моментов, главен фокус е проширување на домашниот пазар, како и развојот на новиот прототип на AI е-продавница, која би требала да се појави во комерцијална употреба во првиот квартал од 2026 година.
На компаниите, со „Вендор“ им овозможуваме да започнат да продаваат онлајн со сопствена е-продавница без програмирање и истата да ја поврзат со банка и други платежни методи со неколку клика, да менаџираат со своите залихи, производи, магацини. Креираме и комплексни екомерц архитектури за ентерпрајз клиенти, во кои се вклучени и мобилни апликации, маркетплејс платформи, лојалти програми и др. Во склоп на компанијата функционира и маркетинг агенција специјализирана за ecommerce кампањи.
Кои се предностите од изборот на „Вендор“, за компаниите, но и за купувачите?
„Вендор“ ја крати потребата од скапи програмери при сетирање на електронска продавница. Функционира како all-in-one решение кое вклучува продавница, сервер, домен и техничко одржување. Една претплата, без дополнителни трошоци. Без потреба од повеќе софтвери или скапи интеграции. Компаниите добиваат брза дигитална трансформација, со соодветна поддршка која им овозможува да растат и да генерираат нови продажби. Можат да управуваат со B2B и B2C продажби, канали, нарачки и клиенти, да носат подобри одлуки, да ги забрзаат внатрешните процеси и да го намалат својот оперативен товар. Ваквото оперирање им овозможува ефикасна синхронизација со сметководството и детални извештаи за работењето. За купувачите значи повисоки стандарди при онлајн купувањето, максимална безбедност на трансакциите и следење на европските регулативи за приватност и заштита на личните податоци.
Колку и како отворањето на онлајн продавница може да им помогне на микро и малите бизниси?
Отворањето на онлајн продавница може да биде клучна трансформација за микро и мали бизниси, бидејќи им овозможува да конкурираат на пазар кој порано бил резервиран за поголеми компании. Е-Продавницата е отворена цело време, без ограничување на работни часови. Компаниите имаат достапност надвор од локалниот пазар, со огромна можност за национална или дури меѓународна продажба. Компаниите имаат продажен канал со намалени трошоци за работа, помала потреба од физички простор и вработени, без скапи закупи и режиски трошоци.
Онлајн присуството, особено со добро дизајнирана продавница, гради доверба кај нови купувачи. Нуди побрза адаптација и раст, особено при тестирање на нови производни линии и промотивни кампањи.
Кои се најголемите предизвици за македонските компании при отвоврањето на онлајн продавница?
Најголеми предизвици се иницијалното поставување на продавницата, затоа што традиционалниот пристап носел доста поголеми трошоци во минатото. Со пристапот на „Вендор“ значително се крати времето за изработка, како и трошоците за поставување. Друг предизвик е синхронизацијата помеѓу различните системи кои ги користи една компанија. Ова го решаваме преку готови интеграции, со цел да им овозможиме на клиентите синхронизирано работење во сите сектори. За крај, предизвик е и ограничувачката легислатива, за чија промена и надградување се залагаме со сите расположливи механизми и влијание кое го поседуваме како една од водечките ecommerce компании во државата.
Колку пазарот и клиентите го прифаќаат онлајн пазарењето во земјава, споредено со регионот или пошироко?
Македонија се уште има доста ниски бројки во однос на регионот. Тоа се должи поради ограничената понуда од страна на компаниите. Дополнително, загрижува и високиот број на офлајн трансакции односно, плаќањето при достава. Повеќе од 60% од нарачките направени на сите продавници изработени преку нашиот систем се со кеш плаќање, нешто на кое треба сериозно да поработи бизнис секторот, пред се со подигање на стандардите на целокупната услуга која ја нудат на интернет.
На Balkan Ecommerce Summit 2025, во Софија имавте презентација на новата верзија на платформата – Vendor Origin, специјализирана за големи компании и ентерпрајз ЕРП системи. Што се новините и деталите?
Origin се фокусира на сложени продукт каталози за компании кои главно имаат десетици до стотици илјади производи и оперираат на големите ЕРП системи како SAP или Dynamic 365 на Microsoft. Идеален е и за компании специјализирани за B2B продажба и интеграции со системи за Loyalty. Во моментов го интегрираме за една од најголемите retail компании во Македонија. Vendor Origin ќе го достигне максималниот потенцијал со лансирање на новиот динамичен сторфронт и менаџмент систем кој работи со помош на вештачка интелигенција.
Неодамна бевте и на Podim Conference 2025, највлијателниот стартап и технолошки самит во регионот Алпи-Адриа во Марибор, Словенија. Какви се вашите впечатоци?
Podim е вредно искуство за нас бидејќи ни покажа каде стоиме во однос на европските стартапи во делот на технологијата, операциите и останатите бизнис параметри. Нивото кое го прикажа конференцијата, целокупната програма и организација не мотивираат да ги следиме стандардите и да ги применуваме сите позитивни практики и во нашиот стартап, со цел да чекориме рамо до рамо без заостанување. Топло ги препорачуваме ваквите регионални и интернационални настани за сите стартапи.
Какви се вашите планови за во иднина?
Целиот фокус е ставен на новата AI е-продавница и интеграцијата на вештачката интелигенција во менаџмент системот. На почетокот на јуни планираме и официјално да ја отвориме нашата нова инвестициска рунда, а тоа значи дека ќе се фокусираме на преговори со потенцијалните фондови и инвеститори. Планирано е рундата да заврши до крајот на годината, се надеваме со позитивен исход за нашата компанија.
Работиме на што поголема автоматизација и на внатрешните процеси, зголемување на тимот и продукциската моќ, како и на официјализирање на две стратешки партнерства со светски познати финтек и софтвер компании.
