Црна Гора е блиску до воведување седумчасовен работен ден и одлуката за тоа би можела да се донесе следната недела, најави премиерот Милојко Спајиќ. Премиерот на Црна Гора најави дека министерката за труд и социјална заштита, Наида Нишиќ, следната недела ќе започне разговори со претставници на синдикатите и работодавачите, каде што ќе се искристализира конечната верзија на реформата со која се воведува седумчасовен работен ден.
„По опширно размислување како да се најде модел кој би ги задоволил и синдикатите и работодавачите, можеме да заклучиме дека сме блиску до решение во однос на воведувањето на седумчасовен работен ден“, најави Спајиќ.
Премиерот наведува дека намерата е преку широки консултации да се спроведе една од најголемите реформи во областа на трудот, која има за цел да го подобри квалитетот на животот на граѓаните на Црна Гора и да обезбеди повеќе време за семејствата, како и поефикасна и попродуктивна работа.
„Во согласност и на работодавачите и на синдикатите, конкретни чекори во случајот со реформата на 7-часовниот работен ден ќе бидат преземени исклучиво со целосна поддршка на социјалните партнери“, вели премиерот на Црна Гора.
Спајиќ смета дека министерката Нишиќ во име на Владата ќе направи се за да се постигне договор во оптимална временска рамка за да се исполнат очекувањата на граѓаните и да се зајакне позицијата на сите вработени во Црна Гора.
(Bizlife)
(фото: Freepik)
