Нов третман за меланом, базиран на вирус на херпес, покажува ветувачки резултати, при што туморите дури и целосно исчезнуваат кај некои пациенти. Повеќе од еден век откако лекарите првпат забележаа дека вирусните инфекции понекогаш можат да го спречат растот на ракот, науката конечно може да го претвори тоа откритие во сигурно оружје. Друг вирус дизајниран да ги убива клетките на ракот, RP1, наскоро би можел да биде одобрен за употреба во САД, нудејќи им нова надеж на пациентите со напреден меланом.
Во клиничко испитување, предводено од Џино Ким Ин од Универзитетот во Јужна Калифорнија, 140 пациенти со напреден меланом примиле инјекции со RP1, генетски модифициран вирус на херпес симплекс, директно во нивните тумори. Овие пациенти претходно не реагирале на стандардни терапии. Покрај RP1, тие примиле и „ниволумаб“, инхибитор на имунолошки контролни точки.
Според резултатите, 30% од пациентите доживеале намалување на туморот, вклучително и на места каде што не бил директно инјектиран. Половина од оние кои реагирале на третманот имале целосен одговор, што значи дека туморите целосно исчезнале, изјави Ин.
Поголемо клиничко испитување со 400 учесници е веќе во тек. Но, Ин вели дека Администрацијата за храна и лекови на САД (FDA) би можела да го одобри RP1 во комбинација со „ниволумаб“ пред да заврши таа подоцнежна фаза од испитувањето, односно до крајот на овој месец.
Единствениот претходно одобрен вирус за убивање на рак е T-VEC, исто така добиен од херпес симплекс. Тој бил одобрен во 2015 година и е модифициран за да произведе GM-CSF, соединение кое стимулира имунолошки одговор. Сепак, T-VEC ретко се користи, бидејќи е тестиран само на површински тумори на кожата.
Спротивно на тоа, RP1 е инјектиран во подлабоки тумори и покажал системски ефекти. Тој ќе ги охрабри туморските клетки да се спојат, дозволувајќи му на вирусот да се шири и да ја зголеми имунолошката активација. Ова укажува на помоќен системски ефект, вели Ин.
Доколку биде одобрен, RP1 би можел да претставува пробив во терапиите што користат вируси за борба против ракот.
(New Scientist)
(фото: Wikimedia)
