Последниве години се зголемува дебатата за тоа кога на децата треба да им се дозволи да користат паметни телефони, таблети, интернет и социјални медиуми. Додека некои научници веруваат дека децата не треба да бидат изложени на никакви екрани пред 2-годишна возраст, други нагласуваат дека децата треба да бидат изложени на денешната технологија што е можно порано.
Студија објавена во Journal of Human Development and Capabilities издаде сериозно предупредување и совет до родителите за тоа кога да им дадат на своите деца паметни телефони и да им дозволат пристап до социјалните медиуми. И дефинитивно не е на возраст од градинка.
Според студијата, анкета спроведена од научници на речиси 2 милиони луѓе во 163 земји покажа дека на децата не треба да им се дозволува да користат паметни телефони пред 13-годишна возраст.
Истражувачите откриле дека употребата на паметни телефони пред 13-годишна возраст може да има значително влијание врз менталното здравје на децата. Тие ја поврзаа употребата на паметни телефони кај помладите деца со суицидални мисли, послаба емоционална регулација, пониска самодоверба и одвојување од реалноста. Ова е особено точно кај девојчињата.
Колку порано детето добило телефон, толку полошо било неговото ментално здравје.
“Ова бара итна акција за ограничување на пристапот до паметни телефони за деца под 13 години, како и понијансирана регулација на дигиталната средина на која се изложени младите, вели водечката авторка на студијата, Тара Тиагараџан, основач и главен научник на Sapien Labs, непрофитната организација што го спроведе истражувањето.
А што ако детето веќе има паметен телефон? Мелиса Гринберг, клинички психолог во Центарот за психотерапија Принстон во Њу Џерси, која не е вклучена во студијата, вели дека не е предоцна да се направи промена дури и ако децата веќе користат паметни телефони.
Родителите, пред сè треба да разговараат со своите деца и да создадат атмосфера на доверба, дозволувајќи им да им се доверат доколку се сретнале со непожелно однесување или содржина. Доколку веќе забележале дека употребата на паметни телефони негативно влијае на однесувањето на нивните деца, можат да се обидат да воведат промени. Но, не нагло и без да разговараат со своите деца.
Ако децата се вознемират, родителите треба да покажат сочувство и разбирање. “Возрасните не реагираат секогаш на најзрел начин кога ќе им одземете нешто или ќе ги замолите да променат навика, а не можеме да очекуваме и нашите деца да го сторат истото”, потсетува Гринберг.
Таа им предлага на родителите да зборуваат за сопствените проблеми со правилното користење на паметните телефони како начин за (буквално) поврзување и да признаат дека сите ние тешко се спротивставуваме на нивната привлечност.
Родителите можат да размислат и за воведување опции за родителска контрола, заклучување на одредени апликации или функции, како и давање на децата „обични мобилни телефони“ без паметни функции.
(CNN)
