Грчкиот министер за труд е на турнеја низ Европа за да ги убеди граѓаните на земјата да се вратат и да помогнат во обновата на работната сила во Грција, повеќе од една деценија откако илјадници луѓе емигрираа во потрага по подобри можности за време на должничката криза, објавува „Фајненшл тајмс“.
Ники Керамеус е на турнеја низ разни европски градови со делегација на грчки работодавци, промовирајќи го враќањето дома, со пораката „Грција повеќе не е истата земја од која избегаа“.
„На почетокот, атмосферата е негативна. Тие нè гледаат како претставници на државата што ги избрка. А предизвикот е уште поголем: да им покажеме дека денешна Грција нема никаква врска со Грција од 2010 или 2012 година“, изјави министерот Керамеус.
Грција се соочува со недостиг на работна сила во целата економија. Повеќе од 600.000, претежно млади и високообразовани, Грци ја напуштија земјата помеѓу 2010 и 2021 година, откако земјата влезе во рецесија. Ниските плати и ограничените можности за напредување, како и чувството дека нема доволно меритократија, се главните причини зошто многумина избираат да останат во странство.
Сепак, постојат знаци дека овој егзодус можеби се менува. Во 2023 година, за прв пат од 2009 година, повеќе луѓе имигрирале отколку што заминале, но не е познато колку од нив се висококвалификувани работници.
Шеесет проценти од луѓето што се вратиле во Грција во текот на 2023 година се на возраст меѓу 20 и 44 години, што се најпродуктивните работни години, според Тасос Анастасатос, главен економист на грчката Евробанка.
Грчката влада нуди разни стимулации за да ги охрабри младите луѓе да се вратат, вклучително и намалување на данокот на доход од 50 проценти во текот на седум години за оние кои работеле во странство најмалку пет години. Околу 6.000 луѓе ја искористиле оваа мерка од 2020 година. Керамеус ќе ја продолжи својата турнеја во Њујорк подоцна оваа година.
На настаните, кои се одржуваат од 2024 година, грчки компании како што се „Егејн ерлајнс“ и „Пирејската пристанишна управа“, заедно со странски фирми како што се „Делоит“ и „Лидл“, бараат нови вработени, а понекогаш и ги вработуваат на лице место.
Сепак, тешко е да се привлечат високоплатени вработени кога платите во Грција се меѓу најниските во Европската унија. Просечните плати се зголемија за 28 проценти од 2016 година, но платите на професионалците што заработуваат повеќе од 1.600 евра месечно едвај ја издржуваат инфлацијата.
„Не можете да изградите одржливо закрепнување ако не ги плаќате професионалците конкурентно. Нема раст без човечки капитал. А без сериозни инвестиции во доживотно учење, кое е сè уште значително под просекот на Европската унија, ризикуваме уште повеќе да заостануваме“, рече Димитрис Малијаропулос, економски советник во Националната банка на Грција.
(Нова Економија)
Фото – Needpix
