Сакате да се преселите во странство и да започнете нов живот? Најновото истражување на InterNations Expat Insider 2025 открива каде иселениците најлесно се вклопуваат, каде заработуваат најдобро и уживаат во најдобриот квалитет на живот – и изненадувачки, САД не се ни блиску до врвот на листата.
Во истражувањето беа анкетирани 10.085 луѓе од 46 земји, со најмалку 50 испитаници од секоја земја. Резултатите беа дадени на скала од 1 до 7, а рангирањата се базираа на пет клучни категории: работа во странство, лични финансии, квалитет на живот, основни потреби на иселениците и леснотија на прилагодување.
Според Катрин Чудоба, директор за маркетинг во InterNations, главната порака на овогодинешното истражување е дека земјите во Азија и Латинска Америка се најпривлечни за иселениците.
„Гледаме растечки тренд личните финансии да бидат поважни за иселениците. Инфлацијата и економската неизвесност влијаат и на оние што живеат во странство“, вели таа, според CNBC Make It.
Додека Панама и Колумбија блескаат, САД паднаа од 35. на 36. место на листата. Чудоба забележува дека САД добиле послаби оценки во сите категории: „Според испитаниците, на САД им недостасува достапност и еднаквост во пристапот до услугите, а квалитетот на здравствената заштита е оценет под стандардот“.
Политичката стабилност и личните слободи добија особено лоши оценки – само 58% од иселениците во САД веруваат дека можат слободно да ги изразат своите мислења, што е под глобалниот просек од 63%.
Панама е прогласена за најдобра земја за иселеници втора година по ред. Дури 94% од иселениците таму се задоволни од својот живот, а 35% од испитаниците се веќе во пензија, додека 18% дошле специјално за да се пензионираат од работниот живот. Трет план е трајно да останат во Панама.
„Панама има совршена комбинација од прифатлива инфраструктура, пријатна клима и отворена, пријателска култура во која лесно се интегрира“, објаснува Чудоба.
Трошоците за живот за едно лице во Панама се во просек за 36,3% пониски отколку во САД. Во помалите градови удобен живот е можен за 800–1.500 долари месечно, додека во главниот град, Панама Сити, потребни ви се до 2.500 долари. Покрај тоа, земјата нуди неколку видови визи, вклучувајќи ја визата „Пријателски нации“, програмата “Пензионадо” и визата за работа од далечина.
Колумбија направи голем скок – од петтото на второто место. Дури 81% од испитаниците се задоволни од своите финансии во Колумбија, а 92% велат дека нивниот приход е доволен за удобно живеење. Трошоците за живот се за 62,2% пониски отколку во САД, а киријата е за дури 76,2%.
„Слично на Панама, Колумбија се издвојува по леснотијата на адаптација, при што странците се чувствуваат добредојдени, лесно се интегрираат и стекнуваат пријатели“, вели Чудоба.
Повеќе од една третина од странците планираат да останат трајно, а уште 47% немаат планови да заминат. Колумбија, исто така, нуди различни визи за странци, од категории мигранти и посетители до категории за инвеститори, работници, пензионери, студенти и дигитални номади.
Топ 10 земји за иселеници во 2025 година:
1.Панама
2.Колумбија
3.Мексико
4.Тајланд
5.Виетнам
6.Кина
7.Обединети Арапски Емирати
8.Индонезија
9.Шпанија
10.Малезија
Шпанија е единствената европска земја во топ 10, што го потврдува трендот дека европските дестинации сè повеќе се борат да го одржат чекорот со конкуренцијата од Латинска Америка и Азија кога станува збор за достапност и квалитет на живот за странците.
(Bizlife)
