Научници од кинескиот универзитет во Пекинг развија материјал толку јак што еден лист со дебелина од само 1,8 мм направен од тој материјал може да запре куршум, што го прави потенцијално најсилната ткаенина некогаш произведена, надминувајќи ги материјалите како што се кевлар и динема.
Панцирите нормално работат со распределба на енергијата на проектилот преку меѓусебно поврзани влакна. Кевларот користи арамидни полимери познати по нивната исклучителна цврстина, но под голем стрес, овие синџири можат да се лизгаат, намалувајќи ја ефикасноста на заштитата.
“Ултрависоката динамичка цврстина е клучна за влакнестите материјали во апликациите што бараат заштита од куршуми”, изјави Џин Жанг, еден од авторите на студијата, која беше објавена во списанието Matter.
Неговиот тим ги усогласи јаглеродните наноцевки со арамидните синџири за да спречи лизгање на молекулите.
“Нашето ново влакно значително ги надминува сите макроскопски високо-перформансни полимерни влакна објавени досега. Нашата ткаенина целосно го надминува кевларот”, истакнува Жанг. Материјалот се нарекува „синтетизиран композит од јаглеродни наноцевки и хетероциклични арамидни влакна“, иако Жанг планира да му даде поедноставно име во иднина.
Еден слој со дебелина од 0,6 милиметри го забавува куршумот од брзина од 300 m/s на 220 m/s. Врз основа на пресметките за апсорпција на енергија, околу три слоја ткаенина се доволни за да се запре куршумот, забележува Жанг, давајќи вкупна дебелина од 1,8 милиметри, додека кевларот бара најмалку 4 милиметри за да се постигне истиот ефект.
Овој пристап потенцијално би можел да се користи за производство на други нови композити. За лична и воена заштита, овие материјали би можеле да се користат за полесен и поефикасен непробоен оклоп, зголемувајќи ја безбедноста без да се загрози мобилноста.
(New Scientist)
