Во време кога креативноста станува сè поважен дел од дигиталната економија, група млади македонски иноватори решија да создадат мост меѓу уметниците, франшизите и фановите ширум светот. FanForge е нивниот одговор на долгогодишниот предизвик со авторските права во фан-заедниците – платформа која им овозможува на уметниците легално да ја монетизираат својата креативност, а на франшизите да добијат свежи, автентични дизајни инспирирани од заедницата.
Овој проект веќе привлече внимание на национално ниво, откако FanForge се најде меѓу најиновативните 50 идеи на натпреварот „Средношколец Милионер“, организиран од Brainster групацијата.
Во продолжение разговараме со тимот зад идејата – млади, талентирани креативци кои веруваат дека Македонија има што да понуди на светската сцена.
За нивната идеја може да се гласа на следниот линк – https://milioner.mk/vote/19a4ba0d-c396-4e8b-b508-57f22289b244?fbclid=PAZXh0bgNhZW0CMTEAc3J0YwZhcHBfaWQMMjU2MjgxMDQwNTU4AAGn-pPwRpuR4OmWb0BT3cvNoMPyzaUbjRBaewfgVGbFB-qgZrevRLFjqhMRM0U_aem_c72E56PFxHVeY8bUkc7taA
Кој е тимот кој стои зад FanForge?
Зад FanForge стои мала, но страстна група млади креативци, дизајнери и љубители на поп-културата. Ана Милосиевска, Ања Софрониевска, Јаков Геговски, Михаела Анастасовска и Виктор Јакимов. Тимот доаѓа од различни области, но сите споделуваме иста визија: да создадеме легален и безбеден простор каде што фан-уметниците можат да ја монетизираат својата креативност, а франшизите да добијат свежа, автентична содржина.
Што всушност е идејата?
Идејата зад FanForge е да се создаде онлајн платформа која легализира и лиценцира фан-артот. Наместо фан-уметниците да се соочуваат со ризик од повреда на авторски права, FanForge им овозможува нивните дела да станат официјално одобрени производи од страна на франшизите.
Со тоа, сите добиваат:
• Уметниците добиваат приход и признание,
• Франшизите добиваат нови, креативни производи и проширување на брендот,
• Обожавателите добиваат уникатна стока со личен печат од заедницата.
Кажете ни повеќе за натпреварот во кој се најдовте меѓу најиновативните идеи
Натпреварот „Средношколец Милионер“ е национална иницијатива насочена кон поттикнување на претприемачкиот дух кај младите во Македонија. Создаден е од страна на Brainster групацијта, со цел учениците да имаат можност да развијат сопствени бизнис идеи, да научат како се создава одржлив бизнис модел и да ги презентираат своите проекти пред експерти, инвеститори и претприемачи. Од вкупно 438 пријавени идеи, идејата FanForge беше избрана меѓу најдобрите 50 идеи во натпреварот. За да поминат во следната фаза на натпреварување, потребно е да влезат во првите 20 идеи коишто може да ги одредите токму вие!
Како замислувате да функционира платформата? Како истата ќе ја монетизирате?
FanForge ќе функционира како онлајн маркетплејс.
Уметниците ќе можат да аплицираат и да поднесуваат дизајни за одредени франшизи.
Франшизите преку систем за одобрување ќе ги лиценцираат дизајните.
Кога фановите ќе купат производ (на пример маица, постер, чашка итн.), системот автоматски ќе го испечати и испрати нарачаниот производ.
Што како млади и креативни луѓе мислите дека недостига на македонскиот пазар?
Недостига поддршка за креативната економија и дигиталните уметници. Во Македонија има огромен број талентирани илустратори, дизајнери и креатори, но многу малку можности тие да заработат легално и фер од својата работа.
Недостигаат и платформи што поврзуваат локална креативност со глобални брендови. Со FanForge сакаме да го промениме тоа – да создадеме мост меѓу уметниците, франшизите и фановите, и да покажеме дека домашната уметност може да биде дел од светската сцена.
