Извршниот директор на Google, Сундар Пичаи, навести дека технолошката компанија размислува за изградба на центри за податоци во вселената, со цел подобро да ја користи сончевата енергија.
Во интервју за Fox News, Пичаи рече дека Google интензивно работи на развој на квантни компјутери, но дека компанијата развива и амбициозни проекти.
„Работиме на квантно пресметување и во тој дух, една од нашите големи идеи е како еден ден можеме да имаме центри за податоци во вселената за подобро да ја користиме сончевата енергија“, рече Пичаи.
Видеоклип од интервјуто беше споделен на социјалната мрежа X (порано Twitter) од корисник по име Bourbon Capital, а објавата го привлече вниманието на извршниот директор на Tesla, Илон Маск, кој одговори со еден збор: „Интересно“.
„Во Google секогаш се гордееме со лансирањето големи, ризични проекти“, рече Пичаи, потсетувајќи се и на долгогодишниот развој на автономни возила преку проектот Waymo.
Тој понатаму објасни дека долгорочната цел на компанијата е да постави центри за податоци поблиску до Сонцето.
„Сакаме да ги поставиме овие центри за податоци во вселената, поблиску до Сонцето, и планираме да го направиме првиот чекор во 2027 година“, рече Пичаи.
Според него, Google планира да испрати мали пакети со компјутери во сателити за да ја тестира технологијата.
„Ќе испратиме мали пакети машини и ќе ги поставиме во сателити, ќе ги тестираме, а потоа ќе почнеме да се шириме. Сигурен сум дека за десет години овој начин на градење центри за податоци ќе се смета за нормален“, рече тој.
Оваа идеја потсетува на претходните најави на Илон Маск од ноември 2025 година, кога рече дека SpaceX планира да биде пионер во развојот на орбитални центри за податоци со користење на нова генерација сателити Starlink, со цел да понуди најевтина инфраструктура за вештачка интелигенција во следните пет години.
(Klix.ba)
