Веќе сме навикнати на тоа дека кога го гледаме ноќното небо, доминира голема, светла месечина. Но, Земјата за неколку дена ќе добие уште една „мини месечина“.
Научниците открија дека новооткриениот астероид, означен како 2024 PT5, привремено ќе стане втора месечина на Земјата. Имено, од 29 септември до 25 ноември тој астероид ќе биде фатен од гравитацијата на Земјата и орбитата околу нашата планета. По таа кратка посета, ќе се врати во својата хелиоцентрична орбита и ќе го продолжи патувањето околу Сонцето.
Астрономите првпат го забележале астероидот на 7 август 2024 година, користејќи ја јужноафриканската опсерваторија АТЛАС. Според нивните проценки, астероидот е со дијаметар од околу 11 метри, а точните димензии би можеле да се утврдат при неговиот престој во близина на Земјата.
Познато е дека астероидот 2024 PT5 доаѓа од астероидниот појас Арџуна, кој се состои од мали астероиди кои имаат орбити околу Сонцето слични на оние на Земјата.
Водечкиот автор на студијата, Карлос де ла Фуенте Маркос, истражувач на Факултетот за математички науки на Универзитетот Комплутенсе во Мадрид, забележа во своите белешки дека астрономите ќе ја искористат близината на астероидот за подобро да го запознаат и да го истража, бидејќи сегашните податоци покажуваат дека астероидот би можел да биде со дијаметар од 42 метри, што би го направило поголем од астероидот што влегол во атмосферата на Земјата над Челјабинск, Русија во 2013 година.
За потсетување, тој астероид имаше дијаметар од 17 до 20 метри и експлодираше во воздухот над тој руски град, ослободувајќи енергија 20 до 30 пати поголема од атомската бомба фрлена на Хирошима, Јапонија. Во тоа време, остатоците од астероидот повредија повеќе од 1.000 луѓе и оштетија повеќе од 7.000 згради.
Но, де ла Фуенте Маркос истакнува дека астероидот 2024 PT5 нема да претставува никаква опасност за луѓето на Земјата. Ниту сега, ниту во следните неколку децении, бидејќи ќе се „смири“ на растојание од околу 4,2 милиони километри. Тоа е околу 10 пати повеќе од растојанието помеѓу Земјата и Месечината.
Тој додава дека ова не е прв и веројатно не последен пат Земјата да добие краткорочен придружник, но не секој астероид ќе стане мини-месечина бидејќи се потребни одредени услови. Значи, астероидот мора да патува со одредена брзина (бавна) и насока (прилично блиску до Земјата, во космичка смисла) за да биде фатен и задржан од Земјината гравитација.
Астероидите кои стануваат мини-месечини доаѓаат на 4,5 милиони километри од Земјата со брзина под 3.600 километри на час. Не е важно колку е голем или мал астероидот, туку како му се приближува.
(Science Alert)
(фото: Pexels)
