Роботот уметник Ai-Da, хуманоид напојуван од вештачка интелигенција, ќе биде првиот од овој вид чија уметничка слика ќе се продава во голема аукциска куќа, соопштија организаторите во средата.
Делото, кое во ноември ќе се најде на аукција на лондонскиот Sotheby’s, е опишано како „опседнат“ портрет на англискиот математичар Алан Тјуринг, кој се смета за татко на модерните компјутери.
Насловен како „АI God“, портретот висок 2,2 метри би можел да се продаде за меѓу 100.000 и 150.000 фунти. Онлајн аукцијата, која вклучува низа форми на дигитална уметност, ќе го истражи пресекот меѓу уметноста и технологијата, објавија од Sotheby’s.
Ултрареалистичниот дизајн на робот наликува на жена со големи очи и кафеава перика и е еден од најнапредните во светот. Се напојува со алгоритми за вештачка интелигенција, има камери во очите и бионички раце.
Ајдан Мелер, сопственик на галерија и основач на студиото Ai-Da Robot, го предводеше тимот што го создаде заедно со експерти за вештачка интелигенција од универзитетите во Оксфорд и Бирмингем во Англија.
Мелер вели дека математичарот и компјутерски научник Тјуринг, кој се прослави како кршач на кодови од Втората светска војна, изрази загриженост за употребата на вештачка интелигенција во 1950-тите години.
Придушените тонови на уметничкото дело и скршените контури на лицето се чини дека укажуваат на борбите за управување со вештачката интелигенција за кои предупреди Тјуринг, рече Мелер.
„Работата на Ai-Da е етерична и прогонувачка и продолжува да се прашува каде ќе не одведе моќта на вештачката интелигенција и глобалната трка за искористување на нејзината моќ“, додаде тој.
Во 2022 година Ai-Da создаде портрети на уметници кои настапувале во Гластонбери, вклучувајќи ги Били Ајлиш, Дијана Рос, Кендрик Ламар и Пол Мeкартни.
Аукцијата ќе трае од 31 октомври до 7 ноември.
(Zimo)
(фото: Ai-Da)
