Многу од најголемите загадувачи во светот не го исполнија рокот на Обединетите нации во понеделникот да ги претстават своите климатски цели, бидејќи напорите за спречување на глобалното затоплување се загрозени поради изборот на американскиот претседател Доналд Трамп.
Речиси 200 земји кои го потпишаа Парискиот договор за климатски промени се соочија со краен рок во понеделникот да ги поднесат своите нови климатски планови до ОН, наведувајќи како имаат намера да ги намалат емисиите до 2035 година. Многу од најголемите светски загадувачи, вклучувајќи ги Кина, Индија и Европската унија, не го сторија тоа до понеделникот наутро.
„Јавноста има право да очекува силен одговор од нивните влади на фактот дека глобалното затоплување сега достигна 1,5 степени Целзиусови за цела година, но всушност, не видовме вистинска (акција“, рече Бил Харе, шеф на институтот за јавна политика Climate Analytics.
Парискиот договор за климатски промени од 2015 година бара од земјите да се обидат да го избегнат глобалното затоплување кое надминува 1,5 степени Целзиусови над просекот од прединдустрискиот период. Досегашните активности не успеаја доволно да ги намалат емисиите за да се постигне ова. Минатата година, просечните глобални температури за прв пат беа повеќе од 1,5 степени Целзиусови над периодот 1850-1900 година.
Големите економии кои најавија нови климатски планови ги вклучуваат САД, Велика Британија, Бразил, Јапонија и Канада, но се очекува Трамп да ги намали придонесите од администрацијата на претходниот претседател Џо Бајден. Трамп минатиот месец нареди повлекување на земјата од Парискиот договор и замрзна некои федерални средства за чиста енергија.
Шефот на ОН за клима, Сајмон Стил, минатата недела рече дека повеќето земји навестиле дека сепак ќе ги подготват своите планови оваа година. Земјите го сфаќаат ова крајно сериозно, што не е изненадувачки со оглед на тоа што овие планови ќе бидат клучни за средствата што владите можат да ги обезбедат од економскиот бум од 2 трилиони долари, рече Стил, мислејќи на глобалните инвестиции од 2 трилиони долари во чиста енергија и инфраструктура минатата година.
Но, пропуштениот рок предизвикува загриженост дека климатските активности паднале од приоритетната листа на владата, при што некои официјални лица сугерираат дека промената на американската климатска политика ги попречува напорите на другите земји. Комесарот за клима на Европската комисија, Вопке Хоекстра, минатиот месец изјави за Reuters дека циклусот на креирање политики на ЕУ не се совпаѓа со крајниот рок на ОН, но дека Брисел ќе го подготви својот план за климатскиот самит на ОН COP30 во ноември.
Индија сè уште не ги завршила студиите потребни за да го подготви својот климатски план. Кина ќе го објави својот климатски план „навремено“, изјави во понеделникот портпаролот на Министерството за надворешни работи. Портпаролот на индонезиското Министерство за животна средина рече дека министерството чека инструкции од кабинетот на претседателот за поднесување на своите климатски цели. Владите на Иран, Русија и Јужна Африка не одговориле на барањата за коментар.
(Reuters)
(фото: Pixabay)
