Јапонскиот производител на автомобили Нисан Мотор ќе инвестира уште 10 милијарди јуани (1,4 милијарди долари) во Кина за да го смени трендот на слаба продажба и да ја достигне тешката конкуренција, изјави денеска неговиот кинески шеф.
„Може да се каже дека бевме малку бавни во пристапот до пазарот, во споредба со многу брзото темпо во Кина“, рече Стивен Ма.
„Кинеските марки беа, да бидам искрен, пребрзи, екстремно брзи и ги фатија сите несвесни. Мислам дека во меѓувреме се ресетиравме“, изјави шефот на јапонската компанија на саемот за автомобили во Шангај.
Нисан продаде помалку од 700.000 возила во Кина во 2024 година, што значи дека неговата продажба е повеќе од преполовена во споредба со 2020 година. Компанијата ја намали прогнозата за продажба на меѓународните пазари во фискалната година што заврши во март, делумно поради проблемите во Кина, нејзиниот втор најголем пазар.
Тие сега одлучија, според директорот, да инвестираат уште 10 милијарди јуани во Кина до крајот на 2026 година. Претходните планови предвидуваа осум нови модели до крајот на 2026 година.
Планот на Нисан е да продолжи со извоз на возила од Кина во „многу други земји, освен можеби една“, рече Ма, мислејќи на САД, кои де факто го запреа увозот на електрични автомобили од Кина за време на мандатот на претходниот претседател Џо Бајден со воведување царини од 100 отсто.
Претседателот Доналд Трамп продолжи со нови царини од 25 отсто за увоз на автомобили, со дополнителни „реципрочни“ царини од 145 отсто за увоз од Кина. „Долго живеев и работев во САД, но не можев да предвидам дека работите ќе одат во таа насока. Ќе извезуваме во многу земји, но кои се уште не можеме да објавиме“, рече Ма.
Извор – Seebiz,eu
Foto – pxhere
