Европската комисија го претстави Законот за вселената на Европската Унија, долгоочекувана регулаторна реформа што ќе влијае на брзорастечката вселенска индустрија.
Законот има за цел да создаде единствен пазар за компаниите што обезбедуваат вселенски услуги во ЕУ, истовремено засилувајќи ги напорите за зголемување на конкурентноста во однос на Соединетите Американски Држави и другите комерцијални вселенски сили.
Законот, исто така, воведува правила за решавање на растечкиот проблем на преоптовареност на вселената со илјадници сателити во орбитата и 128 милиони парчиња вселенски отпад.
Европската комисија соопшти дека новиот закон, исто така, воведува мерки против заканите од сајбер напади и електронски пречки и за промовирање на еколошки одржливото користење на вселенските ресурси.
Законот предвидува безбедно отстранување на сателитите на крајот од оперативните активности, задолжителни проценки на ризикот, мерки за сајбер безбедност за вселенските оператори и воспоставува правила за мерење на влијанијата врз животната средина.
„21-от век ќе биде век на вселената и новите граници во него. Ние сме на почетокот на вселенската револуција“, рече комесарот на Европската Унија за вселена и одбрана, Андриус Кубилиус.
(Al Jazeera Balkans)
