Европската унија ги прифати обврските на американскиот софтверски гигант, корисниците ќе можат да користат пакети без Teams и да пренесуваат податоци на конкурентски платформи.
Европската комисија во петокот ги прифати отстапките предложени од Мајкрософт во врска со неговата платформа Teams со цел да се реши антимонополскиот случај во кој беше вклучен од јули 2023 година, според медиумите. За да ги ублажи обвинувањата за злоупотреба на доминацијата, Мајкрософт предложи да им ги понуди на клиентите своите апликации Office 365 и Microsoft 365 без Teams по пониска цена од пакетите што вклучуваат Teams и вети дека нема да нуди поголеми попусти на Teams од оние што се нудат на пакетите без Teams. Исто така, понуди интероперабилност за конкурентите со одредени производи на Мајкрософт и предложи да им се дозволи на клиентите да ги извлечат своите податоци од пораките на Teams за употреба во конкурентски решенија.
Случајот беше отворен во јули 2023 година по жалбите од конкурентската канцелариска платформа Slack, а во 2024 година од Alfaview, кој го обвини Мајкрософт за злоупотреба на својата доминантна позиција со здружување на Teams со своите пакети Office и Microsoft 365. Во јуни 2024 година, Комисијата донесе прелиминарна одлука дека американскиот технолошки гигант ја злоупотребува својата доминантна позиција на пазарот на професионален софтвер.
Една година подоцна, Комисијата започна пазарен тест за обврските што ги понуди Мајкрософт. „Големите и малите организации низ Европа и светот во голема мера се потпираат на алатки за видеоконференции, разговор и соработка, особено по пандемијата на коронавирусот“, изјави во соопштението комесарот за конкуренција на ЕУ, Тереза Рибера, додавајќи дека одлуката „отвора конкуренција на овој клучен пазар и им гарантира на компаниите слободно да го изберат производот за комуникација и соработка што најдобро одговара на нивните потреби“.
Одлуката на Комисијата го обврзува Мајкрософт седум години, а што се однесува до интероперабилноста и преносливоста на податоците, 10 години. „Сега се свртуваме кон брзо и целосно спроведување на овие нови обврски“, изјави во соопштението Нана-Луиз Линде, потпретседател за европски владини работи на Мајкрософт. Доколку компанијата не ги исполни своите обврски, Комисијата може да изрече казна до 10% од нејзините глобални годишни приходи.
Фото – Needpix
