Депопулацијата на руралните области во Шпанија започна во средината на 20 век, кога луѓето масовно се преселија во градовите, а овој процес се забрза во последните години, особено во внатрешноста на земјата. Иако 84% од територијата на Шпанија е рурална, само 16% од населението живее таму. Владин извештај покажува дека рурална Шпанија изгубила 4,4% од своето население помеѓу 2014 и 2023 година.
„Стотици села ќе исчезнат затоа што младите не сакаат да живеат таму“, предупредува Хуан Хозе Манзано, коосновач на AlmaNatura, организација која работи на ревитализација на руралните области.
Во обид да го свртат трендот, јавните власти и приватните инвеститори нудат различни решенија. Владата дури и формираше посебно министерство посветено на „Празна Шпанија“. Од друга страна, сè повеќе жители на градовите, исцрпени од стрес и високи трошоци за живот, размислуваат да се вратат на село.
Aldeas Abandonadas, агенција специјализирана за продажба на напуштени села, забележува пораст на интересот кај младите Шпанци и странци. Елвира Фафијан, претседателка на агенцијата, вели дека сè повеќе луѓе се свртуваат кон руралниот живот во потрага по мир и попристапни цени. Минатата година село во близина на Бургос беше продадено на холандски пар за 350.000 евра. Новите сопственици, Мајке Геуртс и нејзиниот партнер, планираат да создадат „еко-село“ и да привлечат заедница од истомисленици.
„Сакавме да направиме нешто добро со нашите пари, а не да го поминеме целиот живот пред компјутери“, објаснува Геуртс.
Слична е приказната и во селото Вилалибадо, напуштено повеќе од 30 години, кое го купија браќата Ансотеги во 2007 година. Нивната идеја да реновираат неколку домови за стари лица прерасна во комплекс со ресторан, бар и базени, а селото стана туристичка дестинација.
Една од најуспешните иницијативи е HolaPueblo, програма на AlmaNature која им помага на семејствата да се преселат во села со мало население. Од 2020 година досега 85 семејства се преселиле и отвориле пекари, барови и работилници, предизвикувајќи непосредна економска активност во овие заедници.
Истражувањата, исто така, укажуваат на позитивен пресврт, при што имигрантите на возраст од 20 до 39 години сочинуваат 10% од населението во општините со помалку од 10.000 жители, што укажува на генерациска обнова.
Сепак, експерти како Мигел Гонзалез-Леонардо предупредуваат дека само локалните проекти не можат да ги променат долгорочните демографски трендови. Иако владата инвестираше 10 милијарди евра во 2021 година за борба против депопулацијата, а Андалузија нуди стимулации за купување домови, ефектите од овие мерки досега се ограничени. Како селото Виламорон, некогаш дом на 150 луѓе, кое сега е целосно напуштено на природата, многу места во Шпанија сè уште чекаат на нивна ревитализација.
(Kamatica)
(фото: )
