Новиот ултразвучен кујнски нож C-200, со 40.000 вибрации во секунда, овозможува полесно и попрецизно сечење со помалку физички напор.
Ако некогаш сте сакале кујнски нож да прави повеќе од само сечење, се чини дека дојде време. Seattle Ultrasonics го претстави C-200, првиот ултразвучен кујнски нож дизајниран за домашна употреба, со цена од 399 долари. Овој нож, според производителот, овозможува 50% помалку физички напор при сечење и многу помазни и попрецизни сечења.
Технологијата што претходно беше резервирана за индустриски кујни сега е достапна за домашна употреба. Без разлика дали сечете лизгави домати или тврда келераба, овој нож ветува дека ќе ја претвори секојдневната подготовка на храна од макотрпна работа во вистинско задоволство.
Револуција во кујната: првиот ултразвучен нож за дома
C-200 на прв поглед изгледа како обичен кујнски нож, но притискањето на копче во рачката активира микроскопски вибрации кои создаваат ефект на „нелепење“, олеснувајќи го сечењето на најтврдокорните прехранбени производи и спречувајќи храната да се залепи за површината на сечилото.
Зад овој концепт стои кулинарскиот инженер Скот Хајмендингер, кој поминал шест години развивајќи го ножот и успеал да ја прилагоди технологијата што се користи во индустриски услови за да одговара на обликот на традиционалниот кујнски нож.
Сечилото од 20см е направено од јапонски не’рѓосувачки челик AUS-10 „san mai“, познат по својата издржливост и отпорност на корозија. Ножот може да се користи за класични кулинарски техники како што се сечкање билки, гмечење лук и рачно да се мие, а може да се остри и на традиционален начин.
C-200 работи безжично и има заменлива батерија што се полни преку USB-C порта. За оние кои сакаат поелегантно решение, достапен е и специјален дрвен безжичен полнач за 149 долари, кој може да се монтира на ѕид без дупчење.
Seattle Ultrasonics објави и детално деветминутно видео на YouTube во кое се објаснува науката зад ултразвучното сечење и се демонстрира ножот во акција.
Иако ножот не е специјално дизајниран за луѓе со артритис или намалена подвижност, компанијата потврдува дека намалената сила потребна при сечење е секако предност за секој со помала сила во рацете.
Претпродажбата за C-200 веќе започна на официјалната веб-страница seattleultrasonics.com, а испораката се очекува во јануари 2026 година. Цената е 399 долари во САД. Промотивен пакет со ножот и безжичниот полнач е исто така достапен за 499 долари.
(CNET)
(фото: Pexels)
