Управните одбори на Европската инвестициска банка (ЕИБ) и Европскиот инвестициски фонд (ЕИФ) одобрија вкупно 9,2 милиони нови средства за финансирање за ширење на иновациите во секторот за домување, зајакнување на енергетската безбедност и поддршка на системите за здравствена заштита и водоснабдување низ цела Европа.
400 милиони евра се одобрени за иницијативата HousingTechEU, прва од ваков вид, за поддршка на средните и големите компании на пазарот на домување во ЕУ за забрзување на индустриските, технолошките и градежните иновации.
Како што е наведено во официјалното соопштение, оваа нова иницијатива го поддржува Акцискиот план на Групацијата ЕИБ за прифатливо и одржливо домување, чија цел е да се зголеми алокацијата за прифатливо и одржливо домување на повеќе од четири милијарди евра во 2025 година.
„Квалитетната здравствена заштита и пристапот до подобро домување се основните столбови на социјалната инфраструктура што го поддржува европскиот начин на живот“, изјави претседателката на Групацијата ЕИБ, Надја Калвинјо. „Револуционерната иницијатива за иновации во домувањето усвоена оваа недела покажува дека Европа работи во корист на своите граѓани.“
Управниот одбор на Групацијата ЕИБ, исто така, подготви основа за вкупно 13 проекти во рамките на програмата TechEU за поттикнување на зелената и дигитална транзиција на Европа. Во историски потег во здравствениот сектор, ЕИФ одобри инвестиција во првиот европски фонд за ризичен капитал посветен на педијатријата. Иницијативата ќе овозможи врвните истражувања од детските болници и академските институции да се претворат во револуционерни терапии за решавање на критичните потреби во здравствената заштита на децата. TechEU е убедливо најголемата финансиска програма на ЕУ за поддршка на иновациите и технолошкото лидерство.
ЕИБ, исто така, одобри финансирање за нов проект за прифатливо домување во Германија, нова болница во Холандија, проекти за ветерна енергија во Германија и Португалија, водоводна инфраструктура во Италија и Литванија и одржлив транспорт во Полска.
Надвор од ЕУ, управниот одбор на ЕИФ одобри нова трансакција наменета за собирање над 200 милиони евра финансирање за мали и средни претпријатија (МСП) во Украина. Покрај тоа, одобрено е ново финансирање за развој на приватниот сектор во Африка и поддршка за проекти за вода во Бразил, болници и енергетски мрежи во Србија и геотермална енергија во Исланд.
