Мобилните телефони радикално го променија начинот на кој живееме (во добра, но и во лоша смисла), а по паметните телефони, на пазарот се појавија бројни други паметни уреди. Од часовници до телевизори, до производи од категоријата паметен дом и целосна интеграција на технологијата во нашиот животен простор.
Паметната технологија ги управува термостатите и се грижи секогаш да ни биде удобно во куќата, ѕвончето на вратата е исто така паметно, како и фрижидерите, па дури и осветлувањето, а многу луѓе разговараат со паметни гласовни асистенти за временската прогноза, музиката што сакаат да ја слушаат и слично.
Со оглед на тоа што технологијата напредува и стана неопходен дел од нашето секојдневие, логично е да се помисли дека куќите со текот на времето ќе станат попаметни, односно дека со технологијата ќе можеме да управуваме со сè повеќе опции во нашите домаќинства.
Но, како што објасни Бет Мекгроарти од Глобалниот институт за благосостојба, побарувачката за она што таа го нарече „глупави куќи“ во последно време е во пораст. Во нив, акцентот не е ставен на технологијата и дигитализацијата на сè и сешто, туку на леснотијата на користење и враќањето кон рачните прекинувачи, бројчаници и механички контроли. Постојат неколку причини за овој прилично неочекуван пресврт во размислувањето на корисниците, а Мекгроарти наведе некои од нив, како што се зголемените трошоци за таква паметна технологија, стравот од приватноста и општиот дигитален замор.
Овој тренд се одржува, како што го нарече таа, од растечкиот аналоген начин на размислување за благосостојба што го следат сè поголем број луѓе кои се уморни од гледање во екрани и од одвлекување на вниманието од постојани известувања на своите телефони. Сега фокусот е на создавање помирен, но помалку поврзан простор за живеење.
Архитектот Јан М. Ванг може да ја потврди таквата промена од прва рака. Сè повеќе негови клиенти веруваат дека бројните технологии во позадина – од уреди кои постојано нè слушаат/прислушкуваат до паметни сензори – само создаваат дополнителен стрес. Според тоа, се менува и дизајнот на куќите, во кои сега е потребно минимизирање на дигиталното присуство, објасни тој.
Податоците од Zillow покажуваат дека трендовите се менуваат. Според нивниот извештај за трендовите во домаќинствата за 2026 година, постои зголемена побарувачка за мирни простори во домовите кои првенствено ќе служат за релаксација и читање, а во кои екраните и автоматизацијата играат минимална улога.
Како што истакнува Axios, овој тренд не е универзален, односно не се однесува подеднакво на сите пазари, а во некои делови од САД, како што се Сан Франциско и Остин, купувачите на домови сè уште очекуваат напредната технологија да биде максимално интегрирана во нивните домови и секојдневниот живот.
(Zimo.dnevnik.hr)
Фото – Stock snap.io
