„Ikea“ следната година ќе ги зголеми цените на своите производи во просек за 9%, поради континуираните проблеми со снабдувањето и транспортот, соопшти „Ingka Group“, која поседува и управува со повеќето продавници на шведскиот гигант за мебел.
Изјавата на компанијата доаѓа во услови на зголемена инфлација, која влијае на глобалните економии, што пак се повеќе влијае на потрошувачите.
„Како и многу индустрии, „Ikea“ продолжува да се соочува со значителни ограничувања на транспортот и суровините, без подобрување во догледна иднина“, се вели во соопштението од „Ingka Group“, холдинг компанија која поседува 90% од продавниците во „Ikea“.
„Овие повисоки трошоци, кои се чувствуваат најмногу во Северна Америка и Европа, ќе мора да се пренесат на потрошувачите“, додаваат од компанијата.
Просечното зголемување на цените е околу 9% ширум светот за земјите со продавници на „Ingka Group“, но ќе се разликува од земја до земја поради инфлацијата таму и локалното снабдување и тешкотиите во транспортот, соопшти компанијата.
Според „Ingka“, франшизната компанија „Inter Ikea Group“ направила трошоци од 250 милиони евра во 2021-ва година поради логистичките проблеми кои се продлабочиле по зголемувањето на побарувачката по првата фаза од пандемијата.
Минатиот месец, „Inter Ikea Group“ објави пад на годишната добивка од 17%, припишувајќи го падот на наглото зголемување на трошоците за транспорт и суровини.
Во исто време, компанијата забележа раст на продажбата од 8% за годината до 25,6 милијарди евра.
