Јапонски научници открија иновативен начин за микропластиката која се испушта во водата при перење на алишта во машина да не стигне до океаните. Тие пуштаат звуци додека се испушта водата од машината. Акустичните бранови ги фаќаат микрочестичките од пластика во средината на млазот вода, а водата без пластика истекува низ одводот.
Со перењето алишта секоја година во океаните се испуштаат половина милион тони микропластика. Тоа е еднакво на 3 милијарди маици направени од полиестер. Во текот на тестирањето јапонските научници успеале со оваа иновативна метода да фатат дури 95%-99% од два најчести видови микропластика кои се потенки од човечко влакно.
Ако таа пластика дојде до океаните, преку водените струи ќе допре до секое катче на Земјата – од најдлабоките делови на океаните до арктичкиот мраз. Може да ги изедат морските животни и на тој начин повторно да се вратат во нашиот синџир на исхрана.
Јапонските научници велат дека ова нивно откритие има голем потенцијал да го намали загадувањето со пластика и да ги заштити океаните.
