Фармацевтската компанија Галеника, една од најголемите производители на фармацевтски производи во Србија и регионот, го проширува своето работење со преземањето на компанијата Lifemedic d.o.o. од Белград. Со оваа трансакција, Галеника станува сопственик на 100% од српско-словенечката компанија Lifemedic и ја презема ексклузивната дистрибуција на програмата за производи на реномираната италијанска фармацевтска компанија Pharmalife Research, за пазарите во Србија, Босна и Херцеговина, Северна Македонија и Црна Гора.
Трансакцијата ќе биде завршена откако антимонополските комисии на пазарите во Србија, Северна Македонија и Црна Гора ќе го спроведат процесот на одобрување, што се очекува на крајот на четвртиот квартал од 2023 година, по што ќе започне процесот на интеграција.
Компанијата Галеника е стратешки посветена на постојано проширување на својата палета на производи во корист на потрошувачите. Препознатливоста на брендот, квалитетот, доверливоста и довербата во производите на Галеника ја направија компанијата успешна со децении. Со оваа аквизиција, Галеника доследно продолжува да го шири своето портфолио на производи.
„Откако стана дел од бразилската NC групација, Галеника постигна значителен деловен раст и меѓународна експанзија. Купувањето на компанијата Lifemedic и почетокот на соработката со италијанскиот производител Pharmalife Research претставува уште еден чекор во интернационализацијата на бизнисот на Галеника и ја потврдува нашата целосна посветеност на инвестиции и иновации во согласност со современите потреби на потрошувачите. Pharmalife Research има над 400 производи во своето портфолио и извезува во 60 земји низ светот. Среќни сме што најдовме глобален партнер кој ги споделува нашите вредности и посветеност на квалитетот на производите и здравјето“, рече Рикардо Вијан Маркес, генерален директор на Галеника.
Lifemedic е српско-словенечка компанија со долгогодишно искуство во дистрибуција на додатоци во исхраната и козметички производи произведени од реномирана биофармацевтска компанија – Pharmalife Research од Италија, а воедно Lifemedic е и ексклузивен увозник и дистрибутер за пазарите во регионот. Компанијата има стабилен двоцифрен раст и партнерства со над 5.000 аптеки и малопродажни синџири низ целиот регион. Pharmalife Research е сигурен фармацевтски партнер во областа на педијатријата, додатоци во исхраната, дермокозметиката и фитотерапијата, како во Италија, така и на меѓународните пазари.
„Квалитетот, доверливоста, иновативноста, научниот пристап и претприемачкиот дух на ‘Made in Italy’ доведоа до позиционирање на Pharmalife Research и на домашниот и на меѓународниот пазар. Квалитетот на прво место, заедничките вредности и меѓународната амбиција се нешта во кои ја препознавме компанијата Галеника и затоа Галеника ја сметаме за вистински партнер и долгорочна поддршка за соработка во остварување на заедничките глобални цели“, рече сопственичката на Pharmalife Research, д-р Ана Крупи.
„После 14 години успешно работење на Lifemedic d.o.o. во Србија и регионот, како и континуираниот раст и развој на брендот и производите Pharmalife, верувам дека оваа аквизиција со Галеника ќе донесе дополнителна вредност и ќе придонесе за понатамошно распространување на производите на Pharmalife во регионот“, изјави Зоран Станимировиќ, извршен директор на Lifemedic d.o.o.
