Виното е како животот – полн со изненадувања, грешки, но и совршени моменти. Влатко Анчев, енологот на Винаријата Попов, го знае тоа подобро од секој друг. „Луѓето мислат дека можат да ги измамат своите сетила, но вистината е дека доброто вино никогаш не лаже,“ вели тој, со насмевка што се чини дека ја крие тежината на винскиот свет што го носи на рамена. Во Тиквешкиот регион, каде што лозјата се повеќе од земјиште – тие се наследство, секоја берба е како симфонија на ароми, а секоја шише раскажува приказна која го прави животот малку побогат.
Анчев не е само енолог, тој е раскажувач преку вкусовите. Неговиот пат во светот на виното не е обележан само со технички знаења – туку со љубов кон земјата и разбирање на емоциите што ги буди секое негово вино. „Кога ќе го налееш првото шише од новата берба, чувствуваш како виното живее. Луѓето знаат кога нешто е искрено. Денешниот потрошувач не сака само етикета со скапо име – сака приказна. И виното ја раскажува таа приказна поинаку секој пат.“
Тиквеш не е само регион, тој е цел свет спакуван во шише. Анчев, со својата вештина, создава вина кои ги поместуваат границите – не само во Македонија, туку и на интернационалната сцена. „Понекогаш, најголемиот успех е да го оставиш виното да зборува само за себе. Тоа не значи дека е лесно – напротив, тоа е најтешкото нешто, да направиш вино кое те остава без зборови, на најубав можен начин“
Новинарка | Љубица Ангелкова
Како се роди Винаријата Попов?
Винаријата Попов е приказна за страст, визија и фамилијарни корени. Таа приказна започна со љубов кон земјата и желба да се оживее традицијата. Тоа што денес сме тука е резултат на страст, посветеност и никогаш ненапуштениот сон да го преточиме најдоброто од Тиквеш во секоја капка. Основана во 2001 година, винаријата започна како фамилијарен проект со скромни капацитети. Она што започна со 17 хектари лозје и 150.000 литри капацитет, денес имаме 65 хектари лозје и произведуваме помеѓу 200.000 и 250.000 шишиња вино годишно.
Како енолог, како го дефинирате вашиот пристап кон комбинирање на традиционалните методи од Тиквешкиот регион со современите технолошки процеси?
Виното е како животот – секоја генерација му додава нешто свое, но основата останува иста. Во нашите вина комбинираме старо и ново, традиција и технологија – тие се рефлексија на времето и луѓето. Тиквешкиот регион има богата историја на винарство, и ние ја продолжуваме таа традиција користејќи го знаењето што се пренесувало низ генерации. Модерната технологија овозможува прецизност и контрола што ни помага да ја одржиме уникатноста на нашите вина.
Лозјата на Попов Винарија се сместени во специфични услови – како тие влијаат на квалитетот и карактерот на виното што го произведувате?
Нашите лозја се лоцирани на 65 хектари на три различни тероара околу с,Сопот, каде што микроклимата и почвата создаваат совршени услови за одгледување на грозје.Овие фактори му даваат на нашето вино уникатен ,,белег” – комбинација на овошни ароми и минерални карактеристики кои се типични за Тиквешкиот регион. Ова природно богатство е она што му дава на нашето вино автентичност и длабочина.
Како го одржувате врвниот квалитет на секоја капка вино во годишно производство од помеѓу 200.000 и 250.000 шишиња?
Секое шише е како мало ремек-дело. Одржувањето на квалитетот е процес што бара постојана посветеност. Технологијата ни дава контрола, но љубовта кон земјата ни дава душа. Секој дел од процесот, од бербата до флаширањето, е под строга контрола. Иако произведуваме големи количества, ние никогаш не правиме компромис кога станува збор за квалитетот.
Кои нови иновации или експерименти ги планирате за иднината на винаријата?
Ние постојано експериментираме и се обидуваме да внесеме нови техники во процесот на производство. Иновацијата е патување – од лозјето до чашата. Еден од нашите најнови проекти е воведување на нови сорти грозје и експериментирање со различни методи на ферментација. Планираме производство на пенливи вина по Традиционална метода за да можеме да понудиме нешто ново и освежувачко на пазарот. Во моментот имаме спремно Шардоне за дегоржирање а морам да потенцирам дека најнов експеримент во винарија Попов е производство на Пенливо вино од Кратошија кое ќе биде вистинско освежување во нашиот асортимент.
Како го гледате развојот на македонското винарство во контекст на интернационалната винска сцена и каде ја позиционирате Попов Винарија на таа мапа?
Македонија има голем потенцијал да стане важен играч на глобалната винска сцена. Нашите уникатни услови и традиција ни даваат можност да создадеме вина кои се различни од другите. Попов Винарија се позиционира како бренд кој го комбинира најдоброто од локалното и глобалното. Понекогаш, најголемиот успех е да го оставиш виното да зборува само за себе, и ние со гордост ги претставуваме нашите вина на интернационалниот пазар.
Виното има способност да раскажува приказни. Кое е најинтересното „вино-приказна“ што сте го создале досега и што го прави посебно?
Едно од вината на кое сме особено горди е нашето ,,девојче’’ Кратошијата. Ова вино е како рефлексија на македонската душа – свежо, полно со ароми и со свој карактер. Но, приказната зад него е тоа што го прави посебно а нас особено горди. Кратошијата како сорта за жал заборавена во маргините на нашите Лозја ни даде потик да работиме на неа. Денес после повеќе од 10 години работа во лозје на мојот колег Петар, можеме да се пофалиме дека поседуваме 1 хектар чист насад од Кратошија за која говорат и последните признанијаи. На последните две натпреварувања на Mundosvini, за Кратошија Резерва и Кратошија Гранд резерва добивме признание за најдобро вино од Македонија ( Best of show ) за што сме особено горди.
Како се менува вашата визија за виното со текот на времето? Постои ли вино кое ве „изменило“ како енолог?
Со текот на времето сфатив дека виното не е само технички производ, туку и уметност. Секое вино носи различни емоции. Пред неколку години, работев на вино кое беше толку комплицирано во производството, но кога го пробавме, видовме дека има душа. Тој момент го промени мојот поглед на виното – дека совршенството не е секогаш во техниката, туку во емоциите што ги предизвикува.
Ако би можеле да го вкусите виното од било која историска епоха, кое вино би било тоа и зошто?
Би сакал да го вкусам виното од времето на Римјаните. Тоа е период кој ја постави основата на современото винарство. Без модерни технологии, нивните вина носеле различни квалитети кои денес не можеме да ги реплицираме. Мислам дека би било неверојатно да искусам како тогаш луѓето го доживувале виното.
Како ги интегрирате локалните традиции и модерните трендови во процесот на создавање вино?
Вистинската магија на виното доаѓа од балансирањето на овие два елемента. Традициите ни помагаат да го зачуваме автентичниот вкус на нашиот регион, додека трендовите ни даваат простор за иновација и нови идеи. Тоа е динамичен процес што ни овозможува да создаваме нешто што е и уникатно и модерно.
Што за вас е најголемиот предизвик во создавање на „вино кое зборува“ наинтернационалниот пазар?
Најголемиот предизвик е да најдете начин виното да не биде само уште едно шише на полиците. Потребно е да создадете вино кое ќе остави траен впечаток, кое ќе го предизвика потрошувачот да се врати по уште едно шише. Секој пазар има свои преференции, но виното што зборува секогаш успева да ги надмине тие бариери.
