Со поддршка од Европската Унија, проектот „Smart4You2“ донесе нова енергија во Битола преку културни, гастрономски и дигитални иницијативи, создавајќи нови можности за развој и регионална соработка. Овој проект е дел од прекуграничната соработка меѓу Р.Македонија и Р.Албанија , поттикнувајќи заедничка размена на култура и иновации.
Целодневниот настан „ArtQuake,“ во организација на МКЦ Битола, ги обедини трите клучни сегменти на проектот, комбинирајќи култура, гастрономија и уметност во уникатно искуство за посетителите.
„Food Republic“: Вкусот на традицијата
Програмата започна во „Food Republic,“ каде што беа претставени локални производи од семејни фарми, вина и рачни изработки, славејќи ја автентичноста на регионот и врската помеѓу традицијата и туризмот.
Николче Николовски, домаќин на настанот, истакна:
“Со овој проект, храната станува мост помеѓу туристите и локалните приказни. Ваквите иницијативи покажуваат како традицијата може да инспирира современи искуства.”
„Пит Стоп Тотем“: Нов туристички симбол
Инфо-точката и „Пит Стоп Тотем“ ја поставија Битола како модерна туристичка дестинација, нудејќи информации за настани, знаменитости и природни убавини.
Градоначалникот Тони Коњановски изјави:
“Оваа иницијатива го претставува нашиот град како центар на културата и иновациите. „Пит Стоп Тотем“ е симбол на заедништвото и визијата за иднината.”
Златко Талевски, координатор од МКЦ на проектот, додаде:
”„Smart4You2“ ја покажува моќта на прекуграничната соработка за создавање одржливи туристички решенија и културни содржини кои го зајакнуваат регионот.”
Пациото: Уметност што предизвикува
Денот кулминираше во Пациото на Завод и Музеј Битола, каде што современата уметност и дигиталната технологија создадоа спектакуларен финалe. Со DJ сет на Александар Гроздановски – Херцел и футуристички видео-мапинг на Сергеј Светозарев, Битола стана живо платно на современа уметност.
Сашо Додовски, директор на МКЦ, изјави:
”„ArtQuake“ докажа дека културата може да го трансформира начинот на кој ја доживуваме реалноста. Тоа не беше само настан, туку културен момент што ја редефинира иднината.”
ЕУ: Инвестиција во иднината
Европската унија преку „Smart4You2“ потврдува дека културата, туризмот и иновациите се клучни за создавање одржлива иднина. Преку соработка меѓу Македонија и Албанија, овој проект отвора нови перспективи за економски и културен развој.
