Модната индустрија е соочена со уште еден предизвик од вештачката интелигенција – шведскиот гигант H&M планира да создаде „дигитални близнаци“ од своите модели, што предизвика поделени реакции во индустријата. Компанијата објави дека 30 модели ќе добијат свои верзии со вештачка интелигенција, кои ќе можат да се занимаваат со маркетинг кампањи и објави на социјалните мрежи, но само со согласност на самите модели.
Од H&M тврдат дека моделите ќе ги задржат правата на нивните дигитални верзии и ќе бидат платени секогаш кога ќе се користи верзијата со вештачка интелигенција. Сепак, синдикатите и експертите за работнички права се загрижени дека овој потег може да доведе до намалување на работните места за други професионалци во индустријата, вклучително и шминкери, фризери и технички персонал.
Сара Зиф, основач на Model Alliance, истакнува дека е нејасно како ќе изгледа правичниот надоместок за моделите и предупредува дека овој тренд може дополнително да ги ослаби правата на работниците во индустријата. Слична загриженост изрази и британската синдикална организација Bectu, чии претставници тврдат дека вештачката интелигенција во модата може да има негативно влијание врз целиот екосистем на креативни професионалци.
H&M не е првата компанија која експериментира со модели со вештачка интелигенција. Levi’s и Hugo Boss веќе користеа слични технологии, а брендот Mango лани направи кампања генерирана од вештачка интелигенција за својата помлада линија. Исто така, има се повеќе инфлуенсери со вештачка интелигенција и дигитални манекени, што дополнително ја поттикнува дебатата за улогата на човечките модели во иднината на модата.
Во САД во јуни ќе стапи на сила Законот за модни работници, закон кој бара согласност од моделите за користење на нивниот имиџ преку технологиите за вештачка интелигенција. Европската унија планира да воведе закон за вештачка интелигенција во 2026 година, кој ќе бара јасно означување на сликите генерирани со вештачка интелигенција.
Додека некои тврдат дека вештачката интелигенција може да придонесе за различноста во модната индустрија, други веруваат дека тоа е обид да се намалат трошоците. Иако H&M нагласува дека вештачката интелигенција нема да го промени пристапoт на компанијата фокусиран на луѓето, многумина во индустријата остануваат скептични. Дали е ова иднината на модата или само уште еден обид за зголемување на профитот на сметка на работниците?
(The Guardian)
(фото: Free Malaysia Today)
