Научниците изградија неверојатен сателит за мерење на јаглеродот, кој за жал мора да се исклучи кога лета над САД и Европа.
Европската вселенска агенција (ESA) и Airbus го развија сателитот Biomass, прв од ваков вид, за да овозможи директни мерења на количината на јаглерод складиран во шумите. Сателитот беше лансиран на 29 април и го користи радиоспектарот P-бенд, кој инаку е забранет за сателитска употреба, токму поради потенцијалните пречки со други сателити, особено оние за извидување и шпионажа.
Поради ова, Biomass мора да го исклучи својот радар додека минува над Северна Америка и Европа, вклучувајќи ја и територијата на Европската унија, која ја финансираше мисијата. Мисијата трае пет години и се планира да опфати области во светот каде што моментално нема доволно податоци, како што се тропските шуми во Јужна Америка, особено Амазон.
Како што објаснува менаџерот на мисијата, Клаус Шипал, досега единствен начин да се измери биомасата на дрвјата беше да се сечат и да се измерат, што е неодржливо. P појасот, со своите долги бранови должини, му овозможува на радарот да навлезе низ врвовите на дрвјата и да мери големи гранки и стебла, каде што се наоѓа најголемиот дел од јаглеродот складиран од дрвјата.
Иако Шипал рече дека е „тажно“ што сателитот мора да се исклучи над Европа, главните цели на мисијата остануваат остварливи бидејќи најважните и најмалку проучени шуми се во Јужна Америка, Африка и во Југоисточна Азија.
Добиените податоци ќе им помогнат на научниците и носителите на одлуки подобро да го разберат влијанието на човековите активности врз капацитетот за складирање на јаглерод во шумите, што е од клучно значење во борбата против климатските промени. Во последните 60 години количината на јаглерод диоксид во атмосферата се зголемила 100 пати побрзо отколку при природни промени во минатото, покажуваат податоците на американската агенција НОАА. Ова создава ефект на бранување, вклучувајќи екстремни временски настани и зголемени трошоци за осигурување.
Така, Biomass би можел да игра клучна улога во разбирањето и ублажувањето на климатските промени, дури и со технички ограничувања во одредени региони во светот.
(TCD)
(фото: Wikipedia)
