Животот во Калифорнија, позната по сонцето и плажите, за многумина станува сè подалечен од сон, барем кога станува збор за купување дом. Според истражувањето на Центарот за демографија и политика на Универзитетот Чепмен, купувањето дом во четири големи градови во Калифорнија – Сан Хозе, Лос Анџелес, Сан Франциско и Сан Диего – е прогласено за практично „невозможна мисија“.
Во анализа на 95 пазари на недвижности во текот на третиот квартал од 2024 година, ниту еден пазар не е оценет како „прифатлив“. За да биде оценет како таков, просечната цена на куќата не треба да биде повеќе од три пати поголема од просечниот годишен приход на жителите на областа. Сепак, на листата доминираат градови каде што цената на куќата е најмалку девет пати поголема од просечниот приход.
Најскапиот пазар на недвижности во светот е Хонг Конг, каде што цената на куќата е дури 14,4 пати поголема од просечната плата. Следат Сиднеј, Сан Хозе и Ванкувер, а Хонолулу, Сан Франциско, Мелбурн и Сан Диего исто така се наоѓаат во првите 10.
Топ 10 најнеприфатливи пазари на недвижности:
Хонг Конг – 14,4 пати повисока цена од приходот
Сиднеј – 13,8 пати повисока цена од приходот
Сан Хозе, Калифорнија – 12,1 пати повисока цена од приходот
Ванкувер, Канада – 11,8 пати повисока цена од приходот
Лос Анџелес – 11,2 пати повисока цена од приходот
Аделаида, Австралија – 10,9 пати повисока цена од приходот
Хонолулу – 10,8 пати повисока цена од приходот
Сан Франциско – 10 пати повисока цена од приходот
Мелбурн, Австралија – 9,7 пати повисока цена од приходот
Сан Диего, Калифорнија – 9,5 пати повисока цена од приходот
Зошто цените се толку високи?
Студијата ги припишува високите цени на политиките за урбан развој. Многу влади го ограничуваат ширењето на градовите кон периферијата, што некогаш беше стандарден начин за раст на урбаните области. На пример, во Калифорнија има сè повеќе закони што ги штитат природните земјишта и ја поттикнуваат изградбата на високи згради и помали станбени единици.
Сепак, авторот на извештајот, Вендел Кокс, предупредува дека оваа нова градба честопати не ги задоволува потребите на средната класа, становите се мали, а цените се високи.
Недостатокот на прифатливи станови силно ги погодува средната и работничката класа. Многу Американци сега остануваат под кирија многу подолго, не можат да си дозволат да купат дом и се борат да заштедат за аконтација.
Финансиските советници велат дека купувачите сега се принудени да го продолжат своето пребарување, а воедно да штедат за итни случаи и пензионирање. Многумина едноставно се откажуваат – барем засега.
(Bizlife)
(фото: Public Domain Pictures)
