Акциите на кинескиот производител на електрични возила BYD паднаа најмногу во последните три недели откако беше објавено дека инвестициската фирма на Ворен Бафет, Berkshire Hathaway, целосно се откажала од сопствеништвото во компанијата. Овој потег стави крај на една од најпознатите и најдолготрајните инвестиции на Бафет во Кина.
Акциите на BYD паднаа за 3,4% на берзата во Хонг Конг, меѓу најлошите резултати на денот, откако CNBC објави дека Berkshire Hathaway го продал целиот свој удел во кинескиот производител на електрични возила.
Во извештајот се вели дека Berkshire Hathaway Energy, подружницата што ги држеше акциите, ја прикажа вредноста на инвестицијата како нула во документите од 31 март. Американскиот инвестициски гигант го држи BYD повеќе од 15 години, од септември 2008 година, кога купи 225 милиони акции. Од тогаш до крајот на март оваа година, вредноста на акциите скокна над 4.500%.
Во текот на изминатите две децении, BYD прерасна од мал кинески снабдувач на батерии за мобилни телефони во најголемиот производител на електрични и хибридни возила во земјата. Беркшир почна да го намалува својот удел во сопственост кон средината на 2022 година, а минатата година падна под 5%, поради што фирмата повеќе не е обврзана да пријавува понатамошни продажби на берзата во Хонг Конг.
Сепак, во последните месеци, BYD се соочува со сериозни притисоци. Акциите паднаа за околу 30% од нивниот максимум од пред четири месеци, поради растечките сомнежи дека компанијата може да издржи жестока ценовна војна на пазарот на електрични возила во Кина.
Инвестицијата во BYD ја иницираше долгогодишниот партнер на Бафет, Чарли Мангер, кој заедно со Ли Луу од Хималаја Капитал го убедија Беркшир да влезе во кинескиот производител. На кинеската социјална мрежа Веибо, Ли Џунфеи, генерален директор на BYD за брендирање и односи со јавноста, им се заблагодари на Бафет и Мангер за „17 години поддршка и заедничко патување“.
(Investitor.me)
Фото – Flickr
