Покрај непрекинатото учење нови вештини постои уште една работа која може да ви помогне да бидете успешни – контролата над тоа како го трошите времето. Успешните луѓе често ги прашуваат „Како успевате да направите толку многу во еден ден?“, а одговорот на тоа главно гласи „Едноставно, така што секој ден ја распоредувам работата“.
Вистина е дека е лесно да се заостанува со работата ако немате јасно дефинирани цели што сакате да остварите секој ден. Ако сакате да ги реализирате целите кои сте ги зацртале во кариерата, една од првите вештини кои треба да ги совладате е ефикасно управување со времето.
Еве и како.
Откријте на што го трошите времето
Следете што правите во секој момент во текот на една недела и колку време ви оди на секоја активност, а потоа анализирајте ги резултатите.
Планирајте однапред
Седнете на некое тивко место и 15-20 минути планирајте ја својата недела однапред. Запишете ги клучните проекти и задачи кои треба или сакате да ги направите.
Поставете приоритети
Рангирајте ја својата листа со задачи така што да добиете јасен преглед на најбитните активности, се до оние кои ви се најмалку приоритетни.
Одредете го времето потребно за задачите
Распоредете го времето кое ќе ви биде потребно да ги завршите приоритетните задачи и проекти за неделата. Потоа одредете го времето за активностите кои во се среден приоритет. Ако ви треба повеќе време за задачите кои се пониско рангирани на листата, можеби ќе мора да одложите некои, да побарате повеќе време или да работите прекувремено.
Определете си време за проверка на мејлови
Издвојте одредено време од денот за проверување мејлови. На пример, на почетокот од денот, непосредно пред или после ручекот или на крајот од денот. Избегнувајте да ги проверувате мејловите во друг дел од денот затоа што тоа е неефикасно и ве одвраќа од задачите кои сте си ги одредиле како приоритетни.
