Huawei во Берлин го претстави првиот 5G процесор во светот

Извршниот директор на кинескиот технолошки гигант Huawei, Ричард Ју, денес на саемот IFA во Берлин го претстави новиот процесор Kirin 990 со интегриран 5G модем. Берлин од 6 до 11 септември е посветен само на технологијата, а свеченото отворање на саемот денес го збогати конференцијата на Huawei, на која беа најавени најновите технологии. Процесорот Kirin 990 е првиот 5G процесор во светот моментално. Тој процесор ќе се најде и во новиот смартфон Huawei Mate 30 Pro, кој премиерно ќе биде претставен на 19 септември во Минхен.
Ричард Ју додаде дека вештачката интелигенција денес станува секојдневие, а 4G ги забавува нејзините ефекти во реално времењ, поради што се одлучиле за 5G технологијата, која е нашата иднина. „Ова е најбрзиот 5G модем во светот. Ние донесовме револуција во 5G и во AI технологијата – Kirin 990 5G. Многу компании комбинираат 4G SoC и 5G модеми, но ние носиме револуција каде што имаме се во едно“ истакна Ју.
Новиот процесор е помал од нокт. Има 10,3 милијарди транзистори, брзина на симнување од 2,3 Gbps и на прикачување од 1,25Gbps, ISP 5.0, осмојадрен процесор СPU и 16-јадрен GPU процесор, кој овозможува и 4K HDR видео. Новиот процесор ќе го подобри квалитетот на камерите, фотографирањето ноќе, ќе ја подобри ефикасноста на батеријата, а носи и технологии од професионалните DSLR апарати, како и можност за мерење на срцевиот ритам при правењето селфи фотографии.
Сета таа технологија премиерно ќе биде претставена на 19 септември во Минхен во новиот телефон Huawei Mate 30 Pro.