Светската банка предвидува пад на економијата на гобано ниво за 5,2% оваа година, што би било најдлабока рецесија по Втората светска војна. Повеќето светски економии ќе имаат најголем пад на производството по глава на жител од 1870 година, соопшти Светската банка во извештајот „Глобални економски перспективи“.
Најтешко погодени се оние држави каде пандемијата е најлоша и кои во голема мерка се потпираат на глобалната економија, туризмот, извозот на стоки и надворешното финансирање, се додава во извештајот. Силата на ударот ќе варира од регион до регион, но сите нови пазари и економиите во развој имаат зголемена ранливост, предупредува Светската банка. Во Европа се очекува економски пад од 7% додека во САД 6,1% пред да се појават знаци за обнова во 2021 година. Во 90% од 183 економии се очекува пад на БДП во 2020 година.
Поради сериозно нарушување на домашната понуда и побарувачка, економијата и финансиите, економската активност на напредните економии се очекува да се намали за седум проценти во 2020 година.
Кај новите пазари и економиите во развој се очекува пад од 2,5 проценти оваа година, што е најголемо во изминатите 60 години. СБ предупредува дека приходот по глава на жител се очекува да падне за 3,6 проценти, поради што милиони луѓе ќе се соочат со екстремна сиромаштија оваа година.
