Откако американскиот Стејт департмент објави дека процентот на одбиени визи за Северна Македонија во 2020 година изнесувал нешто над 26%, од Министерството за надворешни работи (МНР) информираат дека е започнат процес за присоединување на земјава кон Програмата за САД за безвизен режим (Visa Waiver Program).
Оттаму посочуваат дека со владина одлука е формирана меѓуресорска работна група предводена од МНР, која се состои од претставници и на други релевантни институции кои работат на исполнување на условите за воспоставување безвизен режим со САД.
„Условите се однесуваат на различни области, но еден од клучните е процентот на одбиени визи да изнесува најмногу 3%. Во тој контекст, нагласуваме дека високиот процент на одбиени визи од безмалку 30% се должи на несоодветните апликации, за што планираме наскоро да започнеме кампања за едуцирање на граѓаните за процесот на аплицирање и условите кои треба да бидат исполнети, со цел добивање виза за САД“, соопштија од МНР.
Од Министерството велат и дека процесот на укинување визи за САД е долгорочен и комплексен процес, кој налага континуирани активности.
„Воедно, приклучувањето на Северна Македонија во Програмата за безвизен режим стана дел од Стратешкиот дијалог со САД и е меѓу проектите во Акцискиот план, што беше усвоен на владина седница во февруари оваа година. Постигнувањето на оваа цел ќе биде од бенефит за економскиот развој на земјава, а ќе внесе и дополнителен импулс за зајакнување на билатералните односи и стратешкото партнерство, како и доближувањето на народите од двете земји“, додаваат од МНР.
