Белгиска компанија за енергија од офшор фарми на ветер ја инсталираше првата станица за електрично полнење на бродови среде море. Целта на станицата е да ги намали емисиите на стакленички гасови од пловните објекти за одржување и транспорт.
Иновативниот систем на компанијата Parkwind е ставен во функција на нејзината ветерна електрана Nobelwind, овозможувајќи им на бродовите директно да користат локално произведена зелена енергија. Компанијата тврди дека методот им овозможува на бродовите да се поврзат на линија за полнење и да останат неподвижни додека се полнат, и покрај морските струи.
„Со користење на обновлива електрична енергија од локални извори ние продолжуваме да ја поддржуваме нашата мисија за производство на чиста енергија, додека ревносно го минимизираме нашиот еколошки отпечаток“, се вели во соопштението на Parkwind.
MJR, компанија за напојување и автоматизација со седиште во Велика Британија, ја разви технологијата во партнерство со Parkwind и заеднички ја интегрираше и ја имплементира. Системот за полнење беше инсталиран во третиот офшор проект за ветер на Parkwind, Nobelwind, кој се наоѓа на 47 километри од белгискиот брег на Северното Море. Објектот има 50 инсталирани турбини на површина од 19,8 km2 и снабдува приближно 190.000 домови со електрична енергија.
Со помош на кран системот беше подигнат во модули откако беше транспортиран со брод за транспорт на екипаж (CTV) од пристаништето до морската трафостаница. За помалку од два дена беше склопен, приклучен и вклучен во трафостаницата.
Според компанијата, успешно била тестирана сигурната испорака на енергија до CVT од целосно оперативната офшор фарма со ветерници и поставила светски рекорд. Исто така, биле направени опсежни тестови во однос на оперативната ефикасност на системот, а од компанијата тврдат дека се постигнати очигледни предности.
Системот нуди едноставно, брзо и безбедно поврзување и исклучување без раце, со што се елиминира потребата за рачно ракување. Структурата што слободно лебди, исто така, нуди ефикасна контрола на затегнатоста, управување со мрежата на синџирот и прицврстување со една точка.
Од Parkwind тврдат дека системот исто така ги следи движењата на бродот, обезбедувајќи сигурна заштита од преоптоварување и автоматско и рачно ослободување во итни случаи. Системот може да се врати и повторно да се поврзе без оштетување на конекторот или потреба од чистење, сушење или ремонт.
„Ние сме посветени да ги направиме сите наши активности што е можно поодржливи и ова е многу важна промена за нашите пловни објекти за одржување, кои сега можат да пристапат до зелената енергија директно од нашите турбини на ветер додека ја вршат својата работа“, изјави Кристоф Верлинден од Parkwind.
Системот е дизајниран да поддржува полнење на CTV пловни објекти со моќност до 2 MW, како и SOV (Service Operation Vessel) пловни објекти со моќност до 8 MW. Исто така, може да обезбеди морска моќ за конвенционалните пловни објекти, со што значително ги намалува емисиите на нивните дизел генератори.
Од Parkwind тврдат дека системот се издвојува како најисплатлив, удобен и сигурен начин за напојување и полнење на море. Ја елиминира потребата за прицврстување и не бара динамични подморнички „папочни“ цевки.
(Klix.ba)
(фото: Parkwind)
