Кога светските патници ја избираат најдобрата земја за патување, одговорот останува ист втора година по ред – Јапонија. Според престижното списание Conde Nast Traveler, кое собира милиони читатели ширум светот, Јапонија го зазеде првото место на листата „Топ земји во светот“ во 2023 и 2024 година, со извонреден резултат од 94,79 поени. Но, што точно ја прави Јапонија толку посебна и зошто туристите ширум светот ја избираат оваа земја како број 1?
Јапонија е единствена дестинација која маестрално ја комбинира античката традиција со футуристичките иновации. Во градовите како Кјото и Нара времето се чини дека застанало, античките храмови, светилишта и зен-градините зрачат со мир и историја. Од друга страна, метрополите како Токио нудат ултрамодерна инфраструктура, светлечки облакодери, роботи во хотели, па дури и паметни тоалети.
Патниците се особено воодушевени од сезонската убавина на Јапонија, без разлика дали се работи за цветовите на црешите во пролет или златно-црвените бои на јапонската есен, природата го одзема здивот, пренесува TU Magazine.
Една од најважните причини зошто туристите се враќаат повторно и повторно е љубезноста на јапонскиот народ. Посетителите од целиот свет го истакнуваат гостопримството, почитта и високото ниво на култура што се чувствува на секој чекор. Во комбинација со исклучителна безбедност и организација, Јапонија нуди навистина патничко искуство без стрес. Брзите “шинкансен” возови, прецизните распореди и беспрекорната чистота на градовите дополнително придонесуваат за впечатокот на земја која функционира совршено.
Јапонската кујна е многу повеќе од само суши. Од миризлив рамен, до крцкава темпура, до сочни јакитори раженчиња – улиците на Јапонија се вистинска кулинарска авантура. Она што ја издвојува јапонската гастрономија е посветеноста на секој детал и почитта кон свежите состојки. Храната не е само оброк, таа е уметност.
На листата со 20 најдобри земји во светот во 2024 година, според читателите на Conde Nast Traveler, Јапонија се издвои на самиот врв, пред дестинациите како Португалија, Турција, Италија и Шпанија.
Топ 5 земји за туристи во 2024 година според читателите се:
1.Јапонија – 94,79 поени
2.Португалија – 92,69 поени
3.Турција – 92,40 поени
4.Италија – 92,16 поени
5.Шпанија – 92,14 поени
Без разлика дали патувате заради култура, природа, безбедност, храна или технологија, Јапонија има се. Тоа не е само дестинација, тоа е искуство што го менува начинот на кој го гледате светот. Ако го планирате вашето следно патување, можеби е време да откриете зошто милиони луѓе ширум светот го мислат истото.
(Bizlife)
