Photonmatrix е името на најновото технолошко решение во борбата против комарците. Тоа е преносен уред кој користи LiDAR скенер и ласерски систем контролиран од галванометар за автоматски да лоцира и да елиминира до 30 комарци во секунда. Уредот работи и во темница, има дострел до 6 метри и може да работи до 16 часа со помош на надворешен power bank.
Достапен е во две верзии: основниот Photonmatrix Basic (дострел од 3 метри, цена од 498 долари) и понапредниот Photonmatrix Pro (дострел од 6 метри, цена од 698 долари). Сè уште има ограничен број уреди достапни по пониски цени за рано купување во кампањата Indiegogo.
Уредот е опремен со паметен чип за автоматско прилагодување и повеќеслојна заштита од преголем напон, а работи така што идентификува комарец според големината на телото, ориентацијата и растојанието во рок од 3 милисекунди и потоа прецизно го насочува ласерот и ја елиминира целта. Photonmatrix доаѓа со држач, напојување и кабел, а можно е опционално да се купи ротирачка основа, батерии и адаптери.
Создавачот на проектот, Џим Вонг, тврди дека е земена предвид безбедноста на луѓето, домашните миленици и другите животни и дека ласерот нема да им наштети на предметите во просторијата, иако сè уште не е прецизирано како се однесува, на пример, во контакт со ТВ екрани или рефлектирачки површини.
Иако во минатото имало слични проекти, Photonmatrix е првиот што комбинира ласерска прецизност, LiDAR и мобилна преносливост во еден уред. Сепак, бидејќи ова е прв обид за групно финансирање без претходно искуство и уредот сè уште е во фаза на прототип, постои одреден ризик. Кампањата веќе ја надмина својата цел од 20.000 долари.
(Tom’s Hardware)
(фото: Indiegogo)
