Започнува изградбата на најголемиот ветерен парк во Северна Македонија, проект поддржан од водечкиот независен менаџер за одржливи инвестиции Алказар Енерџи Партнерс (AEP). Со вкупна инвестиција што надминува 500 милиони американски долари, ова е најголемата приватна инвестиција во обновлива енергија во историјата на земјата.
„За мене е исклучително пријатно чувството денеска бидејќи после нешто повеќе од една година тоа што тогаш го ветивме, заедно со компанијата и инвеститорот, денеска добива некаква завршница, завршница на оваа прва фаза. Тоа беше практично вториот ден од изборот на тогашната нова Влада кога заедно со Даниел Калдерон и со неговите соработници најавивме инвестиција во делот на обновлива енергија во вредност од половина милијарда долари, којашто ќе произведува отприлика 1Tw електрична енергија годишно и дека тоа ќе биде инвестиција којашто ќе биде драјвер и модел како треба во иднина да се движиме“, рече премиерот Христијан Мицкоски. „Имаме уште многу идеи како оваа инвестиција може да додаде уште поголема вредност и да биде уште позначајна и за компанијата инвеститор и за нас како држава, но тоа ќе го разговараме во некоја следна фаза.“
Министерката за енергетика, Сања Божиновска, нагласи дека ова не е еднократна инвестиција, туку долгорочна стратешка ориентација на земјата. „Не само што го менуваме начинот на кој произведуваме енергија, туку го менуваме и нашето размислување. Оваа инвестиција ќе обезбеди нова енергетска инфраструктура, стабилен систем и директен придонес кон интеграцијата на Северна Македонија во европскиот енергетски пазар. Нашата земја не само што ќе произведува за себе, туку ќе произведува и за регионот.“
Министерот за транспорт и врски, Александар Николовски, нагласи дека овој проект има повеќеслојно значење. „Покрај тоа што ќе создаде над 600 локални работни места за време на изградбата, ветерниот парк ќе ја активира и целата инфраструктурна и логистичка мрежа околу него. Ќе се градат нови патишта, ќе се зајакне дигиталната поврзаност и ќе се создадат услови за дополнителни инвестиции.“
Коосновачот и управувачки партнер на „Алказар Енерџи Партнерс“, Даниел Калдерон, изјави: „Горди сме што соработуваме со Северна Македонија на овој историски проект. Би сакал да му се заблагодарам на премиерот Мицкоски за неговата континуирана поддршка. Заедно сме посветени на обезбедување долгорочни придобивки за локалните заедници и на поддршка на амбициите за енергетска безбедност на Северна Македонија.
На почетокот на градежните работи на најголемиот ветерен парк во нашата држава присуствуваа премиерот Христијан Мицкоски, министерот за транспорт и врски Александар Николовски, како и ко-основачот и управувачки партнер на „Алказар енерџи“, Даниел Калдерон.
Ветеропаркот, кој претставува најголема инвестиција во доменот на обновливите извори на енергија во регионот, ќе биде сместен меѓу Штип, Карбинци и Радовиш, зафаќајќи површина од приближно 326 хектари.
Планирано е да бидат инсталирани 55 турбини на ветер кои ќе генерираат електрична енергија доволна за снабдување на околу 100 илјади домаќинства.
Од „Алказар енерџи“ нагласуваат дека спроведувањето на проектот ќе донесе значајни бенефити за економијата, бизнис секторот и граѓаните, “создава трајна вредност за државата и отвора голем потенцијал за понатамошен развој.”
Овој ветерен парк претставува и важен исчекор кон зајакнување на енергетската стабилност и остварување на целите на земјата во однос на обновливата енергија.
