Кинески научници направија голем пробив со развивање на метод што го претвора метанолот, добиен од јаглерод диоксид, во бел шеќер, без потреба од садење шеќерна трска или шеќерна репка. Користејќи систем за биотрансформација in vitro (ivBT), тим од Институтот за индустриска биотехнологија во Тјанџин успеа да синтетизира сахароза со помош на ензими, нудејќи одржлива алтернатива на конвенционалното земјоделство.
Технологијата користи метанол, хемиско соединение со ниска содржина на јаглерод, кое може да се произведе од индустриски отпад или директно од CO₂. Според објавената студија, овој вештачки процес на претворање на CO₂ во храна и хемикалии нуди потенцијал за справување со еколошките и популациските предизвици, како и да придонесе за климатска неутралност.
Истражувачите се базирале на претходната работа на научници од Институтот за хемиска физика Далиан, кои во 2021 година развија метод за конверзија на CO₂ во метанол на ниска температура. Новиот ivBT систем постигнува импресивна стапка на конверзија од 86%, што е голем чекор напред во областа на биопроизводството. Системот не само што произведува сахароза, туку и скроб, и тоа го прави со помала потрошувачка на енергија во споредба со традиционалните методи.
Врз основа на успехот со сахарозата, системот е адаптиран да конвертира други соединенија како што се фруктоза, амилоза, амилопектин, целобиоза и целуо-олигосахариди.
Се очекува дека оваа технологија би можела да игра клучна улога во борбата против климатските промени и обезбедувањето храна за растечката светска популација, која би можела да достигне 10 милијарди луѓе до крајот на векот .
(NDTV)
