Претседателот на САД, Доналд Трамп, досега предизвика многу стрес кај американските технолошки компании со своите потези во врска со воведувањето царини, бидејќи повеќето од нив имаат свои фабрики за чипови, полупроводници и електронски уреди во Азија.
Најновото објавување за воведување царини до 100% на чипови и полупроводници сигурно нема да им ги олесни работите на овие компании. Сепак, не сите компании ќе бидат погодени од овие царини.
Една од нив е – Apple. Имено, Трамп објави дека Apple ќе инвестира дополнителни 100 милијарди долари (мала сума за компанија како Apple) во производство во САД.
Ова значи дека во следните четири години Apple треба да инвестира вкупно 600 милијарди долари во САД и да вработи 20 илјади работници низ целата земја. Но, тоа не значи дека производите на Apple ќе се произведуваат на американска почва.
Инвестицијата се однесува на проширување на синџирот на снабдување на Apple и подобрување на производството. Имено, бројни компоненти што го сочинуваат iPhone веќе се произведуваат во САД, но конечниот уред се склопува во странство. И така ќе остане барем некое време, потврди шефот на Apple, Тим Кук.
Аналитичарите се согласуваат дека е нереално да се очекува Apple да започне со производство на iPhone во САД поради трошоците за работна сила и сложеноста на синџирот на снабдување. Производите на Apple како што се iPhone и iPad се произведуваат првенствено во Кина, додека некои се произведуваат во Виетнам, Тајланд и во Индија.
Иако царините на Трамп само во јуни ја чинеа Apple 800 милиони долари, овој потег се чини дека ги спаси од дополнителни царини.
Бидејќи Трамп објави дека компаниите што се обврзале да произведуваат во САД или ако се во процес на производство во САД (категорија што би ја вклучила Apple) ќе бидат ослободени од царини.
Финансиските резултати ќе покажат дали Apple правилно пресметале дека е полесно (и поевтино) да инвестираат дополнителни 100 милијарди долари отколку да плаќаат царини секој месец. Сигурно е дека го направиле потегот во вистинско време барем привремено да ги избегнат новите царини на Трамп.
(Zimo)
