Samsung повторно е на врвот на пазарот на паметни телефони. Според најновиот извештај на Omdia, јужнокорејскиот гигант го зазеде првото место во третиот квартал од 2025 година, испорачувајќи дури 60,6 милиони уреди. Овој резултат му донесе 19% од глобалниот пазар и раст од 6% во споредба со минатата година.
Apple е втор со 56,5 милиони испораки и 18% од пазарот, што претставува раст од 4% во споредба со минатата година. Третото место му припаѓа на Xiaomi со испорачани 43,4 милиони телефони, 14% пазарен удел и 1% раст на годишно ниво.
Transsion, кој ги поседува брендовите Infinix, iTel и Tecno, е на четвртото место со 28,6 милиони испораки, 9% од пазарот и највисок годишен раст од 12% меѓу петте водечки производители. На петтото место е Vivo со 28,5 милиони испораки и пазарен удел од 9%, со раст од 5% во споредба со третиот квартал од минатата година.
Растот на Samsung беше поттикнат од Galaxy Z Fold7, Flip7, како и од достапните модели A07 и A17. Apple изјави дека основниот iPhone 17 „ги надмина очекувањата во однос на продажбата благодарение на подобрената вредност што ја нуди“. Xiaomi забележа пад во Кина по отстранувањето на владините субвенции, но растот во Азиско-пацифичкиот регион и другите пазари го надомести губитокот. Vivo одржа силна позиција во Индија, го престигна Huawei во Кина и продолжи со растот во Азиско-пацифичкиот регион, Африка и Латинска Америка.
Вкупниот пазар на паметни телефони испорача 320,1 милиони единици во третиот квартал, што е зголемување од 3% во однос на истиот период минатата година. Испораките во Северна Америка и Кина се намалија, додека Азиско-пацифичкиот регион, Блискиот Исток и Африка забележаа силен раст. Африка особено се издвојува со скок од 25%, додека Азиско-пацифичкиот регион порасна за 5%. Интересно е што „Омдија“ наведува дека вкупниот раст на пазарот доаѓа од два сегмента – уреди со цена под 100 долари и оние над 700 долари – додека сегментот од средната класа останува слаб. Аналитичарите очекуваат дека во блиска иднина, повисоките цени на новите уреди ќе го забават растот во сегментот на поевтини телефони.
Фото – Linkedin
